ኢትዮጵያ ኣብ ዝርርብ ግድብ ሕዳሰ ከምዘይትሳተፍ ኣፍሊጣ

ሚንስተር መስኖን ኤነርጂን ስለሺ በቀለ(ዶ/ር ኢንጅነር) Image copyright Getty Images
ናይ ምስሊ መግለጺ ሚንስተር መስኖን ኤነርጂን ስለሺ በቀለ(ዶ/ር ኢንጅነር)

ኢትዮጵያ ብዛዕባ መጻኢ ጉይዳ ግድብ ሕዳሰ ብዝምልከት ኣብ ሓዲሽ ዝርርብ ከምዘይትሳተፍ ሚኒስትሪ ማይ ኢትዮጵያ ስለሺ በቀለ ሓቢሩ።

እቲ ዝርርብ፡ ንጽባሕ ሓሙስን ዓርብን፡ ኣብ ኣመሪካ፡ ሚኒስተራት ጉዳያት ወጻኢ፡ ኢትዮጵያ፡ ግብጽን ሱዳንን ብመንጎኝነት ኣሜረካ ኣብ ዋሽንግተን ዲሲ ክካየድ እዩ ነይሩዎ።

ኣብዚ ወርሒ'ዚ ኣብ መንጎ ኢትዮጵያን፣ ሱዳንን ግብጽን ዝተኻየደ ስሉሳዊ ልዝብ፡ ኣንፈቱ ስሒቱ ተባሂሉ ነይሩ።

እዚ ነገር ነዚ ጉዳይ ቅርበት ዘለዎም ምንጭታት ከምዝገለጽዎ፡ ሱዳን ብወገና ናይ ቅዋም ለውጢ ከምዝገበረትን፡ ከምኡ ድማ ኣመሪካን ባንኪ ዓለምን ንግብጺ ከም ዝድግፉ ብምግላጽ፡ እቲ ልዝብ 4ን1 ከምዝኾነን፤ ኣብ ልዕሊ ኢትዮጵያ ከቢድ ተጽዕኖ ከምዝፈጠረን ይዛረቡ።

ግብጺ፡ ኣስታት 90 ሚእታዊት ናይ ማይ ጠለባ ካብ ፈለግ ኒል እተማልእ ብምዃና፡ እቲ ፈለግ መሰረት ህላወኣ ከምዝኾነ እያ እትገልጽ።

ግድብ ህዳሰ ምስ ተዛዘመ፡ ኣብ ኣፍሪቃ ዝዓበየ ማያዊ ኤለክትሪክ ዘመንጩ ግድብ ክኸውን ትጽቢት ይግበረሉ። ኣብ 2011 ዝጀመረ ህንጸት እቲ ግድብ፡ ኣብቲ ንፈለግ ኒል 85 ሚእታዊት ማይ ዘበርክት ሩባ ኣባይ'ዩ ዝህነጽ ዘሎ።

ኢትዮጵያ ንምታይ ዓብይ ግድብ ክትሃንደልያ?

ብቢልዮናት ብር ዝህነጽ ዘሎ ግድብ ህዳሰ፡ ንዕብየት ኢትዮጵያ ማዕረ ትርግታ ልቢ ኣገዳሲ ከምዝኾነ እዩ ዝቑጽር።

እቲ ግድብ ተሃኒጹ ስርሑ ምስ ጀመረ፡ ኣስታት 6 ሽሕ ዋት ሓይሊ ኤሌክትሪክ ናይ ምምንጫዉ ዓቕሚ ክህልዎ'ዩ።

ብዙሕ ህዝባ፡ ከም ልቡ ሓይሊ ኤሌክትሪክ ንዘይረኽበላ ኢትዮጵያ፡ ኣድላይነት እዚ ግድብ ዘየወላውል እዩ።

ኢትዮጵያ፡ እቲ ግድብ ብሙሉእ ሓይሉ ጸዓት ከመንጩ ምስ ጀመረ፡ ንጎረባብቲ ሃገራት እውን ሓይሊ ኤሌክትሪክ ክትሸይጥ ትኽእል እያ። ሱዳን፣ ደቡብ ሱዳን፣ ኤርትራን ጂቡቲን ካብቲ ግድብ ክረብሓ ይኽእላ።

ብኻልእ ወገን ድማ፡ ኢትዮጵያ ካብቲ ግድብ እትረኽቦ ልዕሊ ዝኾነ ናይ ገንዘብ ረብሓ፡ ሉኣላውነት ከምዝኾነ ሰብ ሞያ ይዛረቡ።

ተመሳሳሊ ዛዕባታት