ኣብ ሞዛምቢክ ዝሞቱ ኢትዮጵያውያን ስደተኛታት፡ ብጃምላ ተቐቢሮም

ኮንቴነር Image copyright Getty Images

ብሰሉስ ንጉሆ፡ ኢትዮጵያውያን ከምዝኾኑ ዝተገልጹ 64 ስደተኛታት ኣብ ሞዛምቢክ ሞይቶም ተረኺቦም።

ቀብሪ ናይዞም ስደተኛታት ድማ፡ ኣብ ሞዛምቢክ ብጃምላ ከምዝተፈጸመ ተገሊጹ'ሎ።

እቶም ስደተኛታት ካብ ማላዊ ናብ ሞዛምቢክ ክሰግሩ ኣብ ዝተሳፈሩላ ናይ መጓዓዝያ መኪና ተዓፊኖም ከም ዝሞቱ ተገሊጹ ነይሩ።

ካልኦት 14 ሰባት ስደተኛታት ኣብታ መኪና ብህይወት ዝተረኸቡ ክኾኑ እንከለዉ፡ ምርመራ ሕማም ኮሮናቫይረስ ተገይሩሎም ካብቲ ሕማም ናጻ ከምዝኾኑ ሰብመዚ ሞዛምቢክ ተዛሪቦም።

ኣብ ጉዳይ እዞም ብህይወት ዝተረኸቡ ስደተኛታት፡ መንግስቲ ሞዛምቢክ ምስ ኤምባሲ ኢትዮጵያን ምስ ዓለማዊ ትካል ስደተኛታትን ብምትሕባር ይሰርሑ ምህላዎም'ውን ተገሊጹ።

ምስ ምስግጋር ናይዞም ስደተኛታት ብዝተኣሳሰር፡ ክልተ ሞዛምቢካውያን ኣብ ቀይዲ ኣትዮም።

እቶም ስደተኛታት ብኸመይ ተረኺቦም?

ሰራሕተኛታት ኢሚግሬሽን ሞዛምቢክ ነታ መኪና ደው ምስ ኣበልዋ እዩ፡ ሞት ናይቶም ስደተኛታት ክፍለጥ ክኢሉ።

Image copyright GIANLUIGI GUERCIA
ናይ ምስሊ መግለጺ ናብ ደቡብ ኣፍሪቃ ክሰግሩ ዝፍትኑ ስደተኛታት፡ በዛ ተቴ እትበሃል ግዝኣት ሞዛምቢክ ኣቢሎም ከምዝሓልፉ ይግለጽ

እቶም ስደተኛታት ሰኣን ኣየር ተዓፊኖም ሞይቶም ክኾኑ ከምዝኽአሉ ይእመን።

ዘዋሪ ናይታ መኪና ደው ክብል ክሕተት ከሎ፡ ደው ክብል ድልየት ኣይነበሮን።

ሰራሕተኛታት ኢሚግሬሽን ከም ዝብልዎ፡ ካብ ውሽጢ እታ መኪና ድምጺ ኣውያት ምስሰምዑ፤ ስደተኛታት ክህልዉ ከም ዝኽእሉ ብምጥርጣሮም እዮም ነታ መኪና ደው ኣቢሎምዋ።

ናብ ደቡብ ኣፍሪቃ ክሰግሩ ዝፍትኑ ስደተኛታት፡ በዛ ተቴ እትበሃል ግዝኣት ሞዛምቢክ ኣቢሎም ከም ዝሓልፉ ይግለጽ።

መንግስቲ ኢትዮጵያ እንታይ ኢሉ?

ቀዳማይ ሚኒስተር ኢትዮጵያ ኣብዪ ኣሕመድ፡ ካብ ማላዊ ናብ ሞዛምቢክ ዝሰግሩ "ብዙሓት ሰባት" ከምዝሞቱ ምስምዑ ከምዘሕዘኖ ኣብ 24 መጋቢት ብትዊተር ገሊጹ ነይሩ።

ንሱ ወሲኹ "ካብ መንጎ እቶም ዝሞቱ፡ ኢትዮጵያውያን ክህልዉ ከምዝኽእሉ" ብምሕባር፡ መንነት ናይቶም መወትቲ ንምፍላጥ ሚኒስትሪ ጉዳያት ወጻኢ ኢትዮጵያ ምስ ዝምልከቶም ሰብ መዚ ይሰርሕ ምህላዉ ገሊጹ ነይሩ።

ድሕሪኡ ግን፡ መንግስቲ ኢትዮጵያ ንዘሎ ምዕባለታት ኮነ መንነት ናይቶም ዝሞቱ ስደተኛታት ዝምልከት ሓበሬታ ኣየውጸአን።

ተመሳሳሊ ዛዕባታት