ኮሮናቫይረስ፡ ብዝሒ ብኮሮናቫይረስ ዝሞቱ ሰባት 100 ሽሕ ሓሊፉ

ብምኽንያት ኮሮናቫይረስ ንዝሞቱ ሰባት ኣብ ዝተገበረ ዝኽሪ ብዙሓት ባንዴራ ሃገሮም ብምሓዝ ሓዘኖም ክገልጹ ተራእዮም'ዮም

ምንጪ ስእሊ, Anadolu Agency/Getty

መግለጺ ስእሊ,

ብምኽንያት ኮሮናቫይረስ ንዝሞቱ ሰባት ኣብ ዝተገበረ ዝኽሪ ብዙሓት ባንዴራ ሃገሮም ብምሓዝ ሓዘኖም ክገልጹ ተራእዮም'ዮም

ኣብ ብራዚል ቁጽሪ ምስ ኮሮናቫይረስ ዝተሓሓዝ ሞት ልዕሊ ሚኢቲ ሽሕ ሓሊፉ።

እቲ ቁጽሪ መወትቲ፡ እታ ሃገር ብብዝሒ ዜጋታታ ዝሰኣነት ካልአይቲ ሃገር ገይሩዋ ኣሎ።

ዛጊድ ማዕበል ኮሮናቫይረስ ዘይነከየላ ብራዚል፡ እቲ ቫይረስ ኣብ ውሽጢ ሰለስተ ኣዋርሕ 50 ሽሕ ሰባት ቀቲሉ'ዩ።

ቑጽሪ መልከፍቲ እቲ ቫይረስ እናወሰኸ ኣብ ዝኸደሉ እዋን 'ውን፡ ኣብ ውሽጢ 50 መዓልታት ጥራሕ ተወሳኺ 50 ሽሕ ሰባት ሞይቶም።

ማዕበል እቲ ቫይረስ ብቐጻሊ ክውስኽ ምዃኑ ኣብ ዝግመተላ ብራዚል ሆቴላትን ሹቛትን ዳግም ተኸፊቶም እዮም።

ንሳዕቤን ኮሮናቫይረስ ኣናኢሱ ዝረኣዮ ፕረዚደንት እታ ሃገር ጄይር ቦልሶናሮ፡ ዝርግሐ እቲ ቫይረስ ንምግታእ ዝውሰዱ ስጉምታት ኣብ ቁጠባ እታ ሃገር ጸቕጢ ዝፈጥሩ ስለዝኾኑ ተፈጻሚ ከይኾኑ ተቓዊሙ እዩ።

ቅድሚ ሓደ ወርሒ ካብቲ ቫይረስ ዝሓወየ ፕረዚደንት ቦልሶናሮ፡ መራሕቲ ግዝኣታት ዘንበሩዎም ክልከላታት ብምቅዋም ብዘይ መሽፈኒ ኣፍን ኣፍጫን ምስ ደገፍቱ ተሰሊፉ ተራእዩ እዩ፡፡

ምንጪ ስእሊ, EPA

መግለጺ ስእሊ,

ፕሬዝደንት ቦልሶናሮ ካብ ኮቪድ-19 ምስ ሓወየ ምስ ደገፈቱ ተራኺቡ እዩ

መንግስቲ እታ ሃገር ዳግም ናብ ምንቅስቓስ ኣብ ዝምለሳ ግዝኣታት ነቲ ቫይረስ ከመይ ከም ዝከላኸላ ዝሕግዝ ዝተዋደደ ትልሚ ስለ ዘይብሉ፡ ሐዚ እውን እቲ ቫይረስ ብዝበኣሰ ክጋፋሕ ከም ዝኽእል ሰብ ሞያ ይገልጹ።

ፕረዚደንት ቦልሶናሮ ብዝወሰዶም ግጉያት ስጉምቲታት፡ ክልተ ምኩራት ሓለፍቲ ሚኒስትሪ ጥዕና ብተኸታታሊ ብፍቓዶም ካብ ስርሖም ተኣልዮም'ዮም።

ኣብዚ ሕጂ እዋን ሚኒስትሪ ጥዕና እታ ሃገር ተሞኩሮ ብዘይብሉ ወታሃደራዊ ጀነራል እዩ ዝምራሕ ዘሎ።

ኣብ ብራዚል ቁጽሪ በቲ ቫይረስ ዝተትሓዙ ሰባት ሰለስተ ሚልዮን ሓሊፉ ኣሎ።

በዚ፡ ካብ ኣመሪካ ቀጺሉ ዝበዘሐ ረኽሲ ዘለዋ ሃገር ኮይና ኣብታ ሃገር ቁጽሪ ብኮሮናቫይረስ ዝሞቱ ሰባት ሚኢቲ ሽሕ ሓሊፉ።