آندرے رسل ان فٹ ہوکر پی ایس ایل سے باہر

آندرے رسل تصویر کے کاپی رائٹ Mark Metcalfe

اسلام آباد یونائٹڈ کے ویسٹ انڈین آل راؤنڈر آندرے رسل ہمسٹرنگ کی تکلیف کے سبب پاکستان سپر لیگ سے باہر ہوگئے ہیں۔

انتیس سالہ آندرے رسل کراچی کنگز کے خلاف شارجہ میں کھیلے گئے میچ کے دوران فیلڈنگ کے دوران میدان سے باہر چلے گئے تھے اور پھر وہ دوبارہ فیلڈنگ کرنے نہیں آئے تھے۔

اس سے قبل لاہور قلندر کے خلاف میچ میں آندرے رسل نے مستفیض الرحمن کو چھکا لگاکر اپنی ٹیم کو سپر اوور میں کامیابی سے ہمکنار کردیا تھا۔

آندرے رسل کا ان فٹ ہوجانا اسلام آباد یونائٹڈ کے لیے بہت بڑا دھچکہ ہے جو پہلے فاسٹ بولر رومان رئیس کے ان فٹ ہوجانے کی وجہ سے سخت پریشان ہے۔

یہ بھی پڑھیے

رومان رئیس کوئٹہ گلیڈی ایٹرز کے خلاف میچ میں فیلڈنگ کرتے ہوئے گھٹنا زخمی ہوجانے کے سبب میدان سے باہر جانے پر مجبور ہوگئے تھے۔

کپتان مصباح الحق بھی ہمسٹرنگ کی تکلیف کے نتیجے میں پہلے دو میچز نہیں کھیل سکے تھے۔

اسلام آباد یونائٹڈ کے ڈائریکٹر کرکٹ اور بولنگ کوچ وقاریونس نے بی بی سی اردو کو بتایا کہ چونکہ ٹی ٹوئنٹی تیز فارمیٹ ہے لہذا کھلاڑیوں کے ان فٹ ہونے کا خطرہ موجود رہتا ہے۔

اس فرنچائز کرکٹ میں ہر ٹیم کے پاس اکیس کھلاڑی ہوتے ہیں اور ہر کھلاڑی کا متبادل موجود ہے۔ رومان رئیس اور آندرے رسل کا ان فٹ ہونا یقیناً اسلام آباد یونائٹڈ کے لیے بڑا نقصان ہے لیکن انہیں امید ہے کہ جن کھلاڑیوں کو ابھی تک موقع نہیں ملا ہے وہ ملنے والے موقع سے فائدہ اٹھائیں گے۔

متعلقہ عنوانات