ہالی وڈ کی معروف اداکارہ ژا ژا گیبور 99 برس کی عمر میں چل بسیں

ژاژا گیبور تصویر کے کاپی رائٹ Getty Images
Image caption ژاژا گیبور ہنگری میں پیدا ہوئي تھیں

ہالی وڈ کی معروف اداکارہ ژا ژا گیبور کا دل کا دورہ پڑنے سے انتقال ہو گیا ہے۔ وہ 99 سال کی تھیں اور ان کے شوہر نے ان کی موت کی تصدیق کی ہے۔

ژا ژا کے شوہر فریڈرک وون اینہالٹ نے خبررساں ادارے اے ایف پی کو بتایا کہ ان کی اہلیہ اہل خانہ اور دوستوں کی موجودگی میں گھر پر انتقال کر گئی ہیں۔

انھوں نے بتایا کہ 'موت کے وقت سارے لوگ گھر پر موجود تھے اور ان کی وفات تنہائی میں نہیں ہوئی۔'

ژاژا گیبور ہنگری میں پیدا ہوئي تھیں اور دوسری جنگ کے عظیم کے بعد ترک وطن کرتے ہوئے امریکہ منتقل ہو گئی تھی۔ انھوں نے ہالی وڈ میں اپنے کریئر کا آغاز سنہ 1952 میں کیا۔ انھوں نے نو بار شادی کی۔

پہلی بار انھوں نے 20 سال کی عمر میں شادی کی جبکہ آخری بار 70 سال کی عمر میں اور ان کی آخری شادی سب سے زیادہ دنوں تک قائم رہی۔

تصویر کے کاپی رائٹ FPG/GETTY IMAGES
Image caption ژا ژا گیبور نے 70 سے زیا دہ فلموں میں اداکاری کی لیکن وہ اپنی سیلبریٹی طرز زندگی کے لیے زیادہ معروف تھیں۔

ان کے مطابق انھوں نے ساڑھے آٹھ بار شادی کی کیونکہ وہ سپین کے ڈیوک کے ساتھ سنہ 1982 میں ہونے والی شادی کو شمار نہیں کرتی ہیں۔

انھوں نے 70 سے زیادہ فلموں میں اداکاری کی لیکن وہ اپنی سیلبریٹی طرز زندگی کے لیے زیادہ معروف تھیں۔

ژاژا ڈاکٹر بننا چاہتی تھیں لیکن ان کی والدہ کے ذہن میں کچھ اور ہی تھا۔ ان کی خوبصورتی کے سبب شوبز ان کی منتظر تھی۔

گیبور کو سنہ 1936 میں مس ہنگری کا تاج پہنایا گيا لیکن بعد میں انھیں خارج کر دیا گيا کیونکہ انھوں نے اپنی عمر کے بارے میں غلط بیانی کی تھی۔

تصویر کے کاپی رائٹ AFP/GETTY IMAGES
Image caption یہ تصویر سنہ 1954 میں لی گئی تھی

ان کی اہم فلموں میں 'مولن روج' (1952)، 'لی لی' (1952) اور 'کوئن آف آؤٹر سپیس' (1958) شامل ہیں۔ انھوں نے 'نائٹ میئر آن ایلم سٹریٹ' سیریز اور 'نیکڈ گن' میں بھی اداکاری کی۔

انھیں ایک ہی اولاد ہوئی جن کی پیدائش سنہ 1947 میں ہوئی۔ ہلٹن ہوٹل کے مالک کونارڈ ہلٹن کے ساتھ شادی کے نتیجے میں یہ بچی پیدا ہوئی۔

وہ ہر کسی کو 'ڈارلنگ' کہہ کر پکارتی تھیں کیونکہ ان کے بقول وہ سب کا نام یاد نہیں رکھ سکتی تھیں۔

ان کی والدہ نے ایک بار کہا کہ 'تم جس کسی کے ساتھ سوتی ہو کوئی ضروری نہیں کہ اس سے شادی بھی کرو۔'

تصویر کے کاپی رائٹ AFP/GETTY IMAGES
Image caption ژا ژا گیبور نے نو بار شادی کی اور آخری بار 70 سال کی عمر میں کی یہاں وہ اپنے آخری شوہر کے ساتھ نظر آ رہی ہیں

انھوں نے کہا تھا کہ وہ ایسا اس لیے کرتی ہیں کہ وہ 'دل سے کبھی کیتھولک عقیدے کے خلاف نہیں جا سکتی ہیں۔'

انھوں نے اپنی خودنوشت 'ون لائف ٹائم از ناٹ اینف' یعنی ایک زندگي کافی نہیں میں دعویٰ کیا ہے کہ انھوں نے 15 سال کی عمر میں اپنا کنوارہ پن کھویا تھا اور وہ بھی جدید ترکی کے بانی کمال اتاترک کے ساتھ۔

انھوں نے اپنے شوہروں کے علاوہ شان کونری، فرینک سیناٹرا کے ساتھ بھی اپنے معاشقے کا ذکر کیا ہے۔ انھوں نے یہ بھی دعویٰ کیا کہ انھوں نے امریکی صدر جان ایف کینیڈی اور موسیقی کے لیجنڈ ایلوس پریسلے کو منع کر دیا تھا۔

انھوں نے اپنے سابق شوہروں کے بارے میں ایک بار کہا تھا کہ انھوں نے کسی سے اتنی نفرت نہیں کی کہ اسے اس کا ہیرا واپس کر دیں۔

تصویر کے کاپی رائٹ TWITTER / GWENDOLINE CHRISTIE
Image caption مشاہیر نے ژاژا کو خراج عقیدت پیش کیا ہے

انھوں نے یہ بھی کہا تھا کہ وہ خانہ داری میں شاندار ہیں۔ جب بھی میں کسی مرد کو چھوڑتی ہوں اس کا گھر رکھ لیتی ہوں۔

عمر کے آخری دور میں ان کی صحت بہت خراب رہنے لگی تھی اور سنہ 2002 میں ایک ایکسیڈنٹ کے بعد وہ وہیل چیئر پر آ گئی تھیں۔

ان کی موت پر انٹرٹینمنٹ کی دنیا نے ان خراج عقیدت پیش کیا ہے۔ امریکی شو کے میزبان لیری کنگ نے لکھا: ’دنیا میں ایک ہی ژاژا گیبور تھی۔ میں انھیں بہت پسند کرتا تھا۔ ریسٹ ان پیس مائی ڈیئر۔‘

متعلقہ عنوانات

اسی بارے میں