بیٹی کی موت کے دوسرے روز اداکارہ ڈیبی رینلڈز بھی چل بسیں

ڈیبی اور کیری فشر تصویر کے کاپی رائٹ AP
Image caption ڈیبی رینالڈز اپنی اداکار بیٹی کیری فشر کے ساتھ

ہالی وڈ کی اداکارہ ڈیبی رینلڈز کے بیٹے ٹوڈ فشر کا کہنا ہے کہ ان کی بہن کیری فشر کی موت کے دوسرے روز ہی صدمے کی وجہ سے ان کی ماں ڈیبی بھی چل بسیں۔

امریکی ذرائع ابلاغ کے مطابق 84 سالہ ڈیبی کو دل کا دورہ پڑا تھا جس کی وجہ سے بدھ کے روز انھیں لاس اینجلس کے ایک ہسپتال لے جایا گیا تھا۔

ایک روز قبل ہی ڈیبی کی بیٹی کیری فشر کا سفر میں دوران پرواز دل کا دورہ پڑا تھا جس کی وجہ سے ان کا انتقال ہوگيا۔

ڈیبی رینالڈز سنہ 1952 میں آنے والی فلم ’سنگن، ان دی رین‘ میں جین کیلی کے مد مقابل اپنے کردار سے شہرت کی بلندیوں پر پہنچی تھیں۔

ان کی بیٹی کیری فشر بھی اداکارہ تھیں جو سٹار وارز سیریز میں 'پرنسیز لیا' کے کردار کے لیے جانی جاتی ہیں۔ 60 سالہ کیری فشر کا انتقال منگل کو دوران سفر جہاز میں حرکت قلب بند ہوجانے کی وجہ سے ہو گیا تھا۔

ڈیبی کے بیٹے ٹوڈ فشر نے اپنی ماں کی موت کا اعلان کرتے ہوئے خبر رساں ادارے ایسوسی ایٹیڈ پریس کو بتایا کہ ’اب وہ کیری کے ساتھ ہیں اور ہم سب صدمے میں ہیں۔‘

انھوں نے مزید کہا کہ ماں کے لیے میری بہن کی موت کا صدمہ کچھ زیادہ ہی تھا جس کی وہ تاب نہ لا سکیں۔

تصویر کے کاپی رائٹ Getty Images
Image caption ڈیبی رینلڈز اپنی بیٹی کیری فشر کے ساتھ، یہ تصویر سنہ 1972 کی ہے

منگل کے روز ہی ڈیبی رینلڈز نے اپنی بیٹی کی موت سے متعلق ایک بیان پوسٹ کیا تھا جس میں انھوں نے اپنی بیٹی کی صلاحیتوں کی تعریف کرنے کے لیے لوگوں کا شکریہ ادا کیا تھا۔

50 اور 60 کے عشرے میں ڈیبی ہالی وڈ کی معروف ہستیوں میں سے ایک تھیں جنھوں نے کئی موسیقی سے لبریز اور مزاحیہ فلموں میں اداکاری کے جوہر دکھائے۔

’سنگن ان دی رین‘ میں بہترین کام کی وجہ سے محض 19 برس کی عمر میں ہی وہ ایک سٹار بن چکی تھیں۔

1964 میں ’انسنکیبل مولی براؤن‘ کے لیے انھیں بہترین اداکارہ کے لیے اکیڈمی ایوارڈ کے لیے بھی نامزد کیا گیا تھا۔

ڈیبی نے سنہ 1955 میں گلوکار ایڈی فشر سے شادی کی تھی جن سے انھیں دو بچے کیری اور ٹوڈ پیدا ہوئے۔ بعد میں فشر سے طلاق ہونے کے بعد ڈیبی نے دو بار شادی کی تھی۔

متعلقہ عنوانات

اسی بارے میں