’اداکار بھی گیم آف تھرونز کے انجام سے بےخبر ہوں گے‘

ایچ بی او تصویر کے کاپی رائٹ Game of Thrones

ایچ بی او کی مشہور ڈراما سیریز 'گیم آف تھرونز' کی کہانی کے انجام کے بارے میں بڑی چہ میگوئیاں ہو رہی ہیں۔ ساتویں سیزن کی کہانی بھی لیک ہوئی۔

تاہم آٹھویں اور آخری سیزن کے بارے میں ایچ بی او نے فیصلہ کیا ہے کہ اس ڈراما سیریز کے متعدد اختتام بنائے جائیں گے تاکہ ایک اختتام لیک ہونے کی صورت میں دوسرا استعمال کیا جا سکے۔

ایچ بی او کے پروگرامنگ کے صدر کیسی بلوئز کا کہنا ہے کہ اس ڈراما سیریز کے اداکاروں کو بھی اس بات کا علم نہیں ہو گا کہ سیریز کا اختتام کیا ہے۔

تصویر کے کاپی رائٹ HBO

کیسی بلوئز نے ایک کالج میں بات کرتے ہوئے کہا 'مجھے معلوم ہے کہ گیم آف تھرونز کے متعدد انجام فلمائے جائیں گے تاکہ کسی کو بھی معلوم نہ ہو کہ اصل انجام کیا ہو گا۔ ڈراما سیریز میں ایسا کرنا پڑتا ہے۔'

انھوں نے مزید کہا 'اس لیے متعدد انجام فلمائے جائیں گے تاکہ کسی کو آخری وقت تک معلوم نہ چل سکے کہ کیا ہو گا۔'

گیم آف تھرونز کے ساتویں سیزن کی کہانی لیک ہو گئی تھی۔ ہیکرز ساتویں سیزن کے سکرپٹ، ایچ بی او کے دستاویزات منظر عام پر لے آئے تھے۔

تصویر کے کاپی رائٹ HBO

انڈیا میں ان چار افراد کو گرفتار کیا گیا جنھوں نے پائریٹڈ قسطیں ممبئی میں آن لائن پر ڈال دیں۔

ساتویں سیزن کی ایک قسط غلطی سے یورپ میں جلدی ریلیز کر دی گئی اور اس قسط کو کئی بار شیئر کیا گیا۔

تصویر کے کاپی رائٹ HBO

واضح رہے کہ گیم آف تھرونز کا ساتواں سیزن غیرقانونی طور پر ایک بلین بار ڈاؤن لوڈ کیا گیا۔

ابھی یہ واضح نہیں ہے کہ گیم آف تھرونز کا آخری سیزن کب نشر کیا جائے گا۔

انٹرٹینمنٹ کی ویب سائٹ ہالی وڈ رپورٹر کا کہنا ہے کہ آخری چھ قسطوں کی پروڈکشن اکتوبر میں شروع ہو گی جو 2018 کے وسط تک جاری رہے گی۔

تصویر کے کاپی رائٹ HBO

کیسی بلوئز کا کہنا ہے کہ 'ہماری پروڈکشن ٹیم شوٹنگ کی ٹائم لائن تیار کر رہی ہے اور اس بات کا تعین کر رہی ہے کہ سپیشل ایفیکٹس کے لیے کتنا وقت درکار ہو گا۔'

ایک اندازے کے مطابق گیم آف تھرونز کے مداحوں کو آخری سیزن کے لیے 2019 تک انتظار کرنا ہو گا۔

متعلقہ عنوانات

اسی بارے میں