عمران خان کے نام کنگنا رناوت کا پیغام

تصویر کے کاپی رائٹ AFP/Getty Images

بالی وڈ اداکارہ کنگنا رناوت کی فلم ’منی کارنیکا‘ تقریباً تیار ہے اور کنگنا فلم کی تکمیل کے آخری مراحل میں خاصی مصروف ہیں لیکن ایسے میں بھی وہ ملک کے سماجی اور سیاسی معاملات پر اپنی رائے دینا نہیں بھولتیں۔

حال ہی میں نامہ نگاروں سے بات کرتے ہوئے انھوں نے سابق کرکٹر اور پاکستان کے متوقع وزیر اعظم عمران خان کو انتخابات میں ان کی کامیابی پر مبارکباد دیتے ہوئے ان کے لیے نیک خواہشات کا اظہار کیا اور ساتھ ہی درخواست بھی کی وہ دونوں ملکوں کے درمیان تعلقات کو بہتر بنانے کی کوشش کریں۔

سلمان خان اپنے بہنوئی ایوش شرما کی فلم 'لو راتری' کا بڑے زور و شور سے پروموشن کر رہے ہیں۔

پروموشن کی پریس کانفرنس میں انھوں نے یہ کہہ ک اپنی بہن ارپتاور ان کے بیٹے آہل کو مدعو کیا کہ اب ہیرو کے شادی شدہ ہونے سے اس کی امیج پر کوئی فرق نہیں پڑتا اور ساتھ ہی مذاق ہی مذاق میں جیجا جی کو یہ بھی سمجھا دیا کہ وہ ان کے نقشِ قدم پر نہ چلیں کیونکہ وہ ان کی بہن کے شوہر ہیں۔ بیچارے جیجا جی بمشکل مسکرا کر رہ گئے۔

یہ بھی پڑھیے

سلمان کی فلم چھوڑنے کی ہمت کس میں ہے؟

کیا پرینکا اور نِک جونز شادی کرنے والے ہیں؟

ووگ میں شاہ رخ کی بیٹی کی تصویر پر تنقید

شکر ہے شادی سے بچ گئی: کنگنا رناوت

تصویر کے کاپی رائٹ Hindustan Times

اسی پریس کانفرنس میں ان کی فلم 'بھارت' کے بارے میں بھی سوال ہوئے۔ فلم کی ہیروئن پرینکا چوپڑہ کے فلم چھوڑ کر جانے سے فلم پہلے ہی خبروں میں ہے۔ پرینکا نے سلمان کی فلم چھوڑ کر کرس پریٹ کے ساتھ ہالی وڈ کا پروجیکٹ سائن کر لیا تھا۔

اب یہ اور بات ہے کہ پرینکا کا ہالی وڈ کا پراجیکٹ ملتوی ہو گیا اور اب یہ سوال کیا جا رہا ہے کہ کیا پرینکا نے فلم 'بھارت' چھوڑ کر کوئی بڑی غلطی کر دی ہے کیونکہ اب کوئی بھی بڑا پروڈیوسر انھیں سائن کرنے سے جھجھکے گا کہ آیا پرینکا کی ترجیحی بالی وڈ ہے بھی یا نہیں۔

جب سلمان سے پرینکا کے بارے میں پوچھا گیا تو انھوں نے انتہائی سادگی سے جواب دیا ’اچھا ہوا کہ پرینکا کی شوٹنگ شروع نہیں کی گئی تھی لیکن جو بھی ہوا اچھا ہوا۔ اب پرینکا انڈیا میں کام کریں یا باہر وہ ملک کا نام تو روشن کر ہی رہی ہیں‘۔

تصویر کے کاپی رائٹ The India Today Group

اب چاہے فلم چھوڑنے کی وجہ شادی ہو یا ہالی وڈ کی پیشکش ہم ان کے لیے خوش ہیں۔ جہاں تک پرینکا کے ہالی وڈ پراجیکٹ کا تعلق ہے تو کہیں ایسا تو نہیں 'نہ خدا ہی مِلا نہ وصالِ صنم ، نہ ادھر کے رہے نہ ادھر کے رہے۔'

بالی وڈ میں اقربا پروری کے شہنشاہ کہے جانے والے کرن جوہر نے اس ہفتے اپنی ایک نئی فلم کا اعلان کیا ہے جس کا نام ہے 'تخت'۔ یہ ایک ملٹی سٹار فلم ہے جس میں رنویر سنگھ، کرینہ کپور، انیل کپور، عالیہ بھٹ، وکی کوشال کے ساتھ ساتھ جھانوی کپور بھی شامل ہیں۔

تصویر کے کاپی رائٹ Mail Today

کرن کافی عرصے بعد کوئی فلم خود ڈائریکٹ کرنے والے ہیں۔ جہاں تک انھیں اقربا پروری کا خطاب ملنے کی بات ہے تو وہ سٹوڈنٹ آف دی ایئر میں اپنے کچھ دوستوں کے بچوں کو پیش کر کے تہے دل سے اسے حاصل کرنے کی کوشش کرتے ہیں۔

تصویر کے کاپی رائٹ CONDE NAST

کہا جا رہا ہے کہ اب وہ اہنے جگری دوست شاہ رخ خان کی بیٹی سہانا خان کو لانچ کرنے والے ہیں یہ اور بات ہے کہ پروڈیوسر کے آگے ممی گوری خان کا نام لکھا ہو گا۔ لیکن بات وہیں آ کر ٹھہرتی ہے کہ ان بچوں کو سٹار خاندان سے ہونے کا فائدہ صرف اسی حد تک ہوتا ہے کہ انھیں پہلا موقع آسانی سے مل جاتا ہے لیکن موقع سے کامیابی تک کا سفر انھیں اپنی صلاحیتوں کے دم پر ہی پورا کرنا ہوتا ہے۔

اسی بارے میں