زویا ناصر: پاکستانی اداکارہ کا جرمن وی لاگر کرسچن بیٹزمین سے منگنی ختم کرنے کا اعلان، پاکستان کے بارے میں اُن کے تاثرات وجہ قرار

زویا ناصر، کرسچن بیٹزمین

،تصویر کا ذریعہInstagram/@zoyanasir

پاکستانی اداکارہ زویا ناصر نے اعلان کیا ہے کہ وہ اب اپنے منگیتر کرسچن بیٹزمین کے ساتھ شادی نہیں کریں گی اور اس کی وجہ اُنھوں نے پاکستان، اُس کی ثقافت، لوگوں اور مذہب کے بارے میں کرسچن کے عدم احساس کو قرار دیا ہے۔

واضح رہے کہ کرسچن بیٹزمین نے اپنی انسٹاگرام سٹوری میں پاکستان کے لوگوں کی جانب سے فلسطینیوں کے حق میں مظاہروں پر پاکستان کے لوگوں کو مخاطب کرتے ہوئے کہا تھا کہ یہ مظاہرے اپنے ملک میں اپنے ہی لوگوں کے لیے کیوں نہیں کیے جا رہے؟

اُنھوں نے کہا تھا کہ 'کیوں سڑکیں اب بھی کچرے سے بھری ہوئی ہیں۔ کیوں لوگ اب بھی کم سے کم پیسوں میں گزارا کر رہے ہیں؟'

یہ بھی پڑھیے

اس کے بعد اُنھوں نے 'سوشل میڈیا کی طاقت' کے بارے میں کہا کہ 'اگر سوشل میڈیا اتنا طاقتور ہے تو کیوں آپ کی حکومت اور آپ کی پولیس میں مثبت تبدیلی نہیں آ رہی؟'

اُنھوں نے اپنی بات جاری رکھتے ہوئے لکھا تھا کہ 'ہم نے پاکستان میں پینے کے صاف پانی کے لیے ایک لاکھ ڈالر چندہ اکٹھا کیا ہے۔ یہ خبروں میں کبھی نہیں آتا۔ لاکھوں لوگوں کا ہر سال آلودہ پانی کی وجہ سے ہلاک ہونا کبھی خبروں میں نہیں آتا۔'

،تصویر کا ذریعہInstagram/@christianbetzmann

پھر کرسچن بیٹزمین نے پاکستانیوں کو کہا کہ جب وہ اپنے ملک میں کچرا پھیلا رہے ہوں اور اپنے لوگوں کی مدد نہ کر رہے ہوں تو اُنھیں دوسروں کے لیے افسردہ ہونا چھوڑ دینا چاہیے۔

اُن کے ان تبصروں کو پاکستانی سوشل میڈیا صارفین نے بالعموم مسترد کرتے ہوئے اُن کو سوشل میڈیا پر جواب دیے اور اس کے بعد سنیچر کی دوپہر کو زویا ناصر نے اعلان کیا کہ وہ اور کرسچن بیٹزمین اب شادی نہیں کریں گے۔

اپنی انسٹاگرام پوسٹ میں اُنھوں نے لکھا کہ 'کچھ مذہبی اور سماجی حدود ہیں جنھیں کسی بھی صورت میں پار نہیں کیا جانا چاہیے، اس لیے علیحدگی کا فیصلہ لیا گیا ہے۔'

بی بی سی کی طرف سے کوشش کے باوجود زویا ناصر سے رابطہ قائم نہیں ہو سکا ہے۔

زویا ناصر کو ٹی وی ڈراموں ہانیہ، دیوانگی اور زیبائش میں اپنے کام کے لیے جانا جاتا ہے اور وہ کرسچن بیٹزمین کے ساتھ پاکستان کے سفر پر مبنی وی لاگز بھی کر چکی ہیں۔

سوشل میڈیا پر پاکستانی صارفین عمومی طور پر زویا ناصر کی حمایت کرتے ہوئے نظر آئے۔

ایک صارف اقصیٰ نے لکھا کہ زویا ناصر نے ایک فوری اور متاثر کن اقدام کیا۔ 'اگر آپ کی سوچ نہیں ملتی، اگر چیزیں مشتبہ محسوس ہوں، تو آپ کو کسی برے تعلق میں پھنس جانے سے پہلے چیزوں کو ختم کر دینا چاہیے۔'

،تصویر کا ذریعہTwitter/@ItsmeAqsaa

ایک اور صارف نے لکھا کہ زویا ناصر نے اس لیے اُن کے ساتھ منگنی ختم کر دی کیونکہ وہ اُن کے مذہب، ثقافت اور لوگوں کی جانب حساسیت سے عاری تھے۔ 'اُن کا فیصلہ بہادرانہ تھا۔ وہ واقعی اقدار اور اصولوں کی حامل خاتون ہیں۔'

اُنھوں نے زویا ناصر کے اچھے مستقبل کے لیے دعا کی۔

،تصویر کا ذریعہTwitter/@SaithAbdullah99

احسن ٹویٹس نامی ایک اکاؤنٹ نے لکھا کہ ایسے بھی کچھ لوگ ہیں جو اپنے فالوورز کھونے کے ڈر سے فلسطین کے بارے میں بات نہیں کر رہے اور دوسری جانب زویا ناصر ہیں جنھوں نے اپنی منگنی اس لیے ختم کر دی کیونکہ کرس 'اسرائیل کے حامی' تھے۔

،تصویر کا ذریعہTwitter/@AhsanTweets_

ایک اور صارف جویریہ رشید نے کرسچن بیٹزمین کی انسٹاگرام سٹوری اور زویا ناصر کی انسٹاگرام پوسٹ کی تصاویر شیئر کرتے ہوئے لکھا کہ پہلے وہ کہہ رہے تھے کہ ’سوشل میڈیا کے پاس کوئی طاقت نہیں‘ اور پھر یہ (منگنی کے خاتمے کا اعلان) ہو گیا۔

،تصویر کا ذریعہTwitter/@Javeriarasheed6