بالی وڈ ڈائری

عامر کی تڑپ

عامر خان
Image caption کہا جاتا ہے کہ عامر خان اپنی فلم کو بہتر بنانے کے لیے حد سے زیادہ محنت کرتے ہیں

عامر خان کا دل اپنے دور کی کامیاب ترین فلموں میں سے ایک فلم ' مدھومتی ' کے اس نغمے کے لیے تڑپ رہا ہے جو دلیپ کمار اور وجینتی مالا پر فلمایا گیا تھا، دل تڑپ تڑپ کے کہہ رہا ہے آ بھی جا ' عامر اس نغمے کو اپنی آنے والی فلم ’دھوبی گھاٹ‘ کے لیے فلمانا چاہتے ہیں اور اس کے لیے انہوں نے بمل رائے کی فیملی سے بھی اجازت لے لی ہے جنہوں نے یہ فلم بنائی تھی۔ بمل رائے کے بیٹے کا کہنا ہے کہ عامر سے ان کے تعلقات گھریلو طرز کے ہیں اس لیے وہ اگر چاہے تو گانے کو ری مکس بھی کر سکتے ہیں۔ یہ بات کچھ حلق سے نہیں اتری ہم نےمانا کہ عمار جیسا اداکار دلیپ کمار جیسے عظیم فنکار کی اداکاری کی سطح تک پہنچنے کی کوشش کر سکتے ہیں لیکن کیا اس خوبصورت نغمے کو ری مکس کرنے اور اسے نیا چولا پہنانے کی کوشش کو پرستار پسند کریں گے؟

شاہ رخ پر تین سو کروڑ روپے

Image caption شاہ رخ خان کی نئی فلم را ون جلد ہی ریلیز ہونے والی ہے

بالی وڈ میں فلمیں چاہے فلاپ ہوں یا انڈسٹری خسارے میں ہو شاہ رخ کی امیج پر کچھ اثر نہیں پڑتا تبھی تو خان کی فلم ڈان ٹو ابھی سیٹ پر بھی نہیں گئی کہ بگ پکچرز نے ایکسل انٹرٹینمینٹ کمپنی سے اس کےحقوق ایک سو پچیس کروڑ روپیوں میں خرید لیے اور ایروز انٹرنیشنل نے خود خان کیہوم پروڈکشن کی فلم را۔ون کے حقوق ایک سو پچھتر کروڑ روپیوں میں خریدے۔ یہ ثابت ہو گیا کہ بالی وڈ میں خان برادرز کے نام آج بھی اہمیت رکھتے ہیں اور شاہ رخ ان میں نمبر ون کی پوزیشن پر قبضہ جمائے ہوئے ہیں۔

روپوش قطرینہ

Image caption قطرینہ کیف اور سلمان خان کی دوستی کے کئی برسوں سے چرچے ہیں

قطرینہ کیف کا نام آج کل بالی وڈ گلیاروں میں کہیں سنائی ہی نہیں دے رہا ہے۔ کیسے سنائی دے گی جبکہ سلمان اور زرین کی دوستی کی خبریں زبان زد عام ہیں۔ خیر ہمارے خبری نے یہ جاننے کی کوشش کی کہ آخر کیٹ ہیں کہاں؟ پتہ چلا کہ وہ اس وقت سپین میں ' زندگی نہ ملے گی دوبارہ ' کے سیٹ پر ہیں۔اور بہت مصروف بھی۔ اب یہ کیٹ کی خوش نصیبی ہے کہ وہ ایسی خبروں اور چہ می گوئیوں کے دور میں ممبئی نہیں سپین میں ہیں ورنہ میڈیا اور ان کے سوالات۔

رتیک کی پتنگ

Image caption رتک روشن کی فلم ' کائٹس' بری طرح فلاپ رہی

راکیش روشن کے بیٹے رتیک کی پتنگ برابر اُڑ نہیں سکی اس لیے اب پاپا نے اس کٹی پتنگ کو ہوا میں چھوڑنے کے بجائے اسے آسمان کی اونچائیوں پر اڑانے کا فیصلہ کر لیا ہے۔ نا ۔۔نا۔۔ وہ کائٹس کا سیکوئیل نہیں بنا رہے وہ ایسا سوچ بھی نہیں سکتے انہوں نے تو بلکہ فلم کِرش کا سیکوئیل بنانے کے لیے فٹافٹ میٹنگ شروع کر دی ہے۔ ویسے کرش بھی تو آسمان میں اُڑتے نظر آتے ہیں۔ کہیں۔خیر چلیے ہم اچھی اچھی بات کرتے ہیں اور چاہتے ہیں کہ رتیک کی یہ فلم کامیاب ہو کیونکہ اب پاپا فلم دل سے بنانے والے ہیں۔

سری نگر کا لمحہ

Image caption بپاشا باسو لمحے فلم میں اہم کردار ادا کررہی ہیں

فلمساز بنٹی والیا بہت مایوس ہو گئے ہیں انہیں کیا پتہ تھا کہ ایسے وقت میں جب کشمیر کی وادیوں میں فلمائی گئی اور ان کے مسائل پر بنی فلم ’لمحہ‘ بن کر تیار ہو گی کشمیر کےحالات اتنے خراب ہو چکے ہوں گے کہ ان کی فلم کا پریمیئر تک وہاں نہ ہو سکے۔ جی ہاں فلم لمحہ کا پریمیئر سری نگر میں ہونا طے تھا لیکن شومئی قسمت۔۔۔

عمران کی تمنا

عمران خان نے کچھ عرصہ پہلے ہی خواہش ظاہر کی تھی کہ وہ کرینہ سے پیار کرنا چاہتے ہیں اور اب ان کی یہ تمنا جلد ہی پوری ہو گی۔ آپ یہ مت سوچئے کہ ہمارا دماغ خراب ہو گیا ہے اور عمران کی اس خواہش پر سیف نے اب تک خاموشی کیوں اختیار کی ہے۔ ارے بابا عمران پردے پر کرینہ سے عشق لڑانا چاہتے ہیں اور وہ دونوں بہت جلد کرن جوہر کی اگلی فلم میں ایک ساتھ نظر آئیں گے۔

شمی کا شگون

پرانے دور کے ہینڈسم چلبلے ہیرو شمی کپور اپنے لیے چاہے اتنے خوش قسمت نہ رہے ہوں جتنا انہیں عامر خان اپنے لیے نیک شگون مانتے ہیں۔ عامر کی کوئی بھی فلم ہو وہ اسے ریلیز کرنے سے پہلے شمی انکل کے پاس جاتے ہیں اور اس فلم کے میوزک کی پہلی کاپی انہیں دیتے ہیں۔ یعنی ان کےہاتھوں اپنی فلم کا اجراء۔ عامر مانتے ہیں کہ شمی انکل کا ہاتھ لگنے سے ان کی تمام فلمیں ہٹ ہوتی ہیں۔

رتیک کا پتلا

بگ بی، شاہ رخ ، سلمان خان اور ایشوریہ رائے کے بعد اب رتیک روشن موم کے بننے والے ہیں۔ جی ہاں انہیں مادام تساد کے اس میوزیم میں جگہ ملے گی جہاں پہلے سے بالی وڈ کے سٹارز موم بن کر کھڑے ہیں۔ رتیک اور ان کے پاپا راکیش بہت خوش ہیں۔ جنوری میں رتیک کا ناپ لینے ٹیم ممبئی پہنچے گی۔ میوزیم میں ویسے بالی وڈ فیملی میں اضافہ ہو رہا ہے۔ سب چاہتے تھے کہ عامر بھی ان میں شامل ہوں لیکن عامر ایسے پہلے بالی وڈ اداکار ہیں جنہوں نے یہ اعزاز حاصل کرنے سے انکار کر دیا تھا۔