ہنگر گیمز کا تین سو ملین ڈالر کا کاروبار

تصویر کے کاپی رائٹ AP
Image caption امریکی سینماؤں میں ہنگر گیمز دیکھنے والوں کی قطاریں لگ گئیں

ہالی وڈ کی ایکشن فلم ’ہنگر گیمز‘ اپنی ریلیز کے تیسرے ہفتے میں بھی امریکی باکس آفس پر سرفہرست ہے اور اس نے اب تک تین سو ملین ڈالر سے زائد کا کاروبار کیا ہے۔

اٹھتہر ملین ڈالر کی لاگت سے تیار کی گئی یہ فلم دنیا بھر میں کل ملا کر چار سو ساٹھ ملین ڈالر کا کاروبار کر چکی ہے۔

اس فلم نے نمائش کے پہلے ہی ہفتے میں ایک سو پچپن ملین امریکی ڈالر کا کاروبار کر کے آمدنی کا نیا ریکارڈ قائم کیا تھا۔

امریکہ کے علاوہ برطانوی باکس آفس پر بھی گزشتہ ہفتے ہنگر گیمز سب سے کامیاب فلم تھی جبکہ رواں ہفتے کے نتائج بدھ تک آئیں گے۔

آج تک کسی بھی فلم کی نمائش کے پہلے ہفتے میں کمائی کے اعتبار سے یہ رقم تیسرے نمبر پر ہے جبکہ یہ اس معاملے میں اول نمبر پر ہے کہ یہ کسی فلم کا سیکوئل نہیں ہے کیونکہ اس سے قبل اگر کسی فلم کی پہلے ہفتے میں اس سے زیادہ کمائی ہوئی ہے تو وہ کسی نہ کسی فلم کا سیکوئل تھیں۔

سوزانے کولنز کے ناول پر مبنی فلم ہنگر گیمز ایک ایسی دوشیزہ کی کہانی ہے جو کہ زندگی اور موت کے گیم شو میں اپنی زندگی کی جنگ لڑ رہی ہے۔

اس دوشیزہ کا کردار مشہور ہالی ووڈ اداکارہ جینیفر لارنس نے نبھایا ہے جنہیں سن دو ہزار گیارہ میں ’ونٹرز بون‘ جیسے زبردست ڈرامے میں آسکر انعام کے لیے نامزد کیا گیا تھا۔

تصویر کے کاپی رائٹ AP

امریکی باکس آفس کے تجزیہ کار پال عابدین کا کہنا ہے کہ اس فلم کی کامیابی کی وجہ اس ناول کی مقبولیت ہے جس پر یہ فلم بنی ہے اور اس کے علاوہ اسے اپنی ریلیز کے زمانے میں کسی بڑی اور اچھی فلم سے مقابلے کا سامنا بھی نہیں رہا ہے۔

امریکی باکس آفس پر اس ہفتے دوسرے نمبر پر رہنے والی فلم امریکن ری یونین ہے جبکہ تیسرا درجہ مشہور فلم ٹائٹینک کے تھری ڈی ورژن کو ملا ہے۔

ٹائٹینک کے حادثے کے سو سال کی تکمیل کے موقع پر اس فلم کا تھری ڈی ورژن ریلیز کیا گیا ہے۔ گیارہ آسکر ایوارڈ جیتنے والی یہ فلم ایک طویل عرصے تک کمائی کے اعتبار سے ہالی وڈ کی کامیاب ترین فلم رہی اور گزشتہ برس اوتار نے اس سے یہ اعزاز چھین لیا تھا۔

ری ریلیز کے بعد ٹائٹینک مجموعی طور پر ایک ارب نوے کروڑ ڈالر کما چکی ہے جبکہ اوتار نے دو ارب اسّی کروڑ ڈالر کا کاروبار کیا تھا۔.

اسی بارے میں