بالی وڈ اداکار راجیش کھنہ چل بسے

Image caption راجیش کھنہ کو بالی وڈ کا پہلا سپر سٹار کہا جاتا ہے

بھارتی فلم انڈسٹری پر برسوں تک راج کرنے والے اداکار راجیش کھنہ ممبئی کے ایک ہسپتال میں چل بسے۔

69 سالہ راجیش کھنہ ایک لمبے عرصے سے سرطان کے مرض میں مبتلا تھے۔

گزشتہ ماہ جون میں ان کی صحت زیادہ خراب ہو گئی تھی۔

اس وقت راجیش کھنہ کے مینیجر اشونی نے خبر رساں ادارے پی ٹی آئی کو بتایا تھا کہ ’ان کی صحت اچھی نہیں ہے اور وہ گھر ہی پر ہیں۔ انہوں نے تین چار روز سے کھانا بھی نہیں کھایا ہے‘۔

راجیش کھنہ نے امردیپ، دو راستے، بے وفائی، محبوب کی مہندی، آرادھنا، کٹی پتنگ، آنند جیسی مقبول ترین فلموں میں کام کیا ہے۔

راجیش کھنہ کے بارے میں کہا جاتا ہے کہ وہ ہندی فلم کے پہلے ایسے ہیرو تھے جنہوں نے لگاتار پندرہ سپرہٹ فلموں میں کام کیا ہے۔

راجیش کھنہ پیار میں کا کا کے نام سے بھی جانے جاتے ہیں۔ ساٹھ اور ستّر کے عشرے کے دوران راجیش کھنہ ممبئی فلم انڈسٹری کے سب سے مقبول اداکار تھے۔

راجیش کھنہ کو بالی وڈ کا پہلا سپر سٹار کہا جاتا ہے۔

حال ہی میں وہ زمانے بعد ٹی وی پر ایک کمپنی کے پنکھے کے اشتہار میں نظر آئے اور ان کے اس کام کے بھی کافی تذکرے رہے ہیں۔

اسی بارے میں