راز 3: ’بپاشا کی اصل زندگی کی کہانی‘

تصویر کے کاپی رائٹ official website

مہیش بھٹ کی آنے والی فلم راز تھری کی کہانی ایک ایسی ہیروئین کی ہے، جو ٹاپ پر ہوتی ہے لیکن ایک نئی اداکارہ کے آنے کے بعد وہ اس سے خطرہ محسوس کرتی ہے، اور اس پر کالا جادو کرتی ہے، تاکہ وہ اپنے کیریئر پر آئے ’خطرے‘ کو دور کر سکے۔

فلم میں اداکارہ بپاشا باسو نے اہم کردار ادا کیا ہے اور فلم کے پروڈیوسر مہیش بھٹ کے مطابق ایک طرح سے فلم کی کہانی بپاشا باسو کی اصل کہانی ہے۔

فلم کے بارے میں بات کرتے ہوئے مہیش بھٹ نے کہا، ’ہم نے اس فلم کو بنانے کے بارے میں جب سوچا، تو بپاشا کا کیریئر کچھ خاص نہیں چل رہا تھا۔ ذاتی زندگی میں بھی وہ ٹوٹی ہوئی تھیں۔ ان کا کسی خاص سے رشتہ ٹوٹا تھا۔‘

’ میں نے بپاشا سے کہا کہ جب تک تم اس فلم میں اپنی اصل زندگی کی سچائی نہیں ڈالو گي، فلم میں بات نہیں بنے گی۔ کیونکہ تم خود اکیلی ہو، تنہا ہو، تمہاری سٹارڈم کو جھٹکا لگا ہے۔ تمہاری فلمز نہیں چل رہی ہیں اور جو نئی لڑکیاں آئی ہیں، وہ تم سے اچھا کر رہی ہیں۔‘

’ اگر تم اس حقیقت کو پردے پر لا سکو، تو اچھا ہوگا‘۔ مہیش بھٹ کے مطابق، بپاشا نے اسی وجہ سے فلم میں بہترین کام کیا ہے۔

راز 3، تھري ڈي فلم ہے جو سات ستمبر کو ریلیز ہو رہی ہے۔ فلم کی ہدایات مہیش بھٹ نے دی ہیں۔ بپاشا کے علاوہ اس میں ایشا گپتا بھی اہم کردار ادا کر رہی ہیں۔

اس کے علاوہ مہیش بھٹ نے اپنی فلم جسم 2 کا بھی ذکر کیا، جسے ان کی بیٹی پوجا بھٹ نے ہدایت کی ہے۔ فلم میں پورن اسٹار سنی ليوني نے اہم کردار ادا کیا۔

مہیش بھٹ نے فلم پر ہونے والے تنقید کا جواب دیتے ہوئے کہا کہ فلم 12 کروڑ کے بجٹ میں بنی اور اس نے پہلے اختتام ہفتہ تک 21 کروڑ کا بزنس کر لیا اور وہ اس سے خوش ہیں۔

مہیش بھٹ نے کہا کہ بڑی عجیب بات ہے کہ جب وہ فلم بنا رہے تھے تو لوگوں نے کہا کہ کیسی بولڈ فلم بنا رہے ہو اور اب فلم دیکھنے کے بعد لوگ کہہ رہے ہیں کہ کیسی فلم ہے، اس میں بولڈ سین تو ہیں ہی نہیں۔

مہیش بھٹ نے یہ بھی کہا کہ آج کل کے دور میں اگر فلم کو اچھی اوپننگ نہیں ملتی تو اس کا بعد میں کامیاب ہونا بہت مشکل ہوتا ہے۔ سارا کھیل شروع کے تین دن کا ہے۔

اسی بارے میں