سنجے دت کو سپریم کورٹ سے ایک ماہ کی مہلت

سنجے دت
Image caption سنجے دت اس سے قبل اسی معاملے میں اٹھارہ ماہ کی سزا کاٹ چکے ہیں

بالی وڈ کے معروف اداکار سنجے دت کو بھارتی سپریم کورٹ نے غیر قانونی ہتھیار رکھنے کے الزام میں جیل حکام کے سامنے خود سپردگی کے لیے چار ہفتوں کی مہلت دے دی ہے۔

واضح رہے کہ گزشتہ ماہ عدالت عظمیٰ نے سنجے دت کو 1993 میں ممبئی میں ہونے والے بم دھماکوں کے دوران غیر قانونی طور پر اسلحہ رکھنے پر پانچ برس قید کی سزا سنائی تھی اور خود سپردگی کےلیے انہیں اٹھارہ اپریل تک کا وقت دیا گیا تھا۔

سنجے دت نے عدالت سے اپیل کی تھی کہ انہیں مزید چھ مہینوں کی مہلت دی جائے لیکن ان کی درخواست پر سماعت کرتے ہوئے عدالت نے انہیں صرف چار ہفتوں کی مہلت دی ہے۔ یہ اضافی مہلت اٹھارہ اپریل سے شروع ہو رہی ہے۔

اس کے ساتھ ہی عدالت نے کہا ہے کہ اس کے بعد انہیں مزید مہلت نہیں دی جائے گی اور یہ کہ انہیں یہ مہلت صرف انسانی ہمدردی کی بنیاد پر دی گئی ہے۔

اس سے قبل عدالت نے بھارت کے سب سے بڑے تفتیشی ادارے سی بی آئی کی اس دلیل کو خارج کردیا جس میں کہا گیا تھا کہ سنجے دت کو مزید مہلت نہیں دی جا سکتی ہے۔

اطلاعات کے مطابق ان کی کئي فلمیں شوٹنگ کے درمیانی مراحل میں ہیں جس میں تقریباً تین سو کروڑ روپے کی سرمایہ کاری ہوئی ہے۔

Image caption سنجے دت کی فلموں پر انڈسٹری میں تقریباً تین سو کروڑ روپے سرمایہ کاری کی گئی ہے

چند روز قبل انہوں نے کہا تھا کہ وہ سزا کے خلاف اپیل یا رحم کی درخواست نہیں کریں گے۔

دریں اثناء سپریم کورٹ کے سابق جج اور پریس کونسل آف انڈیا کے سربراہ جسٹس مارکنڈے کاٹجو نے انسانی ہمدردی کی بنیاد پر سنجے دت کی سزام معاف کرنے کے لیے ریاست مہاراشٹر کے گورنر اور صدر مملکت سے رحم کی باضابطہ درخواست کی ہے۔

فلم سٹار کو غیرقانونی اسلحہ رکھنے کے جرم میں پہلے چھ سال کی قید سنائی گئی تھی جسے حال میں کم کرکے پانچ سال کر دیا گیا لیکن وہ اسی زمانے میں تقریبا ڈیڑھ برس جیل میں رہ چکے ہیں اور اس طرح انہیں اب تقریبا ساڑھے تین برس تک قید میں رہنا ہوگا۔ وہ 2007 سے ضمانت پر تھے۔

سال دو ہزار چھ میں انسداد دہشت گردی کی خصوصی عدالت نے بم حملوں میں سو افراد کو مجرم قرار دیا تھا اور ان میں سے بارہ افراد کو سزائے موت اور بیس کو عمر قید کی سزا سنائی تھی۔

ممبئی میں سن انیس سو ترانوے میں سلسلہ وار بارہ بم دھماکے ہوئے تھے جن میں 257 افراد ہلاک اور 713 زخمی ہوئے تھے۔

اسی بارے میں