میں دلیپ کمار سے کوسوں پیچھے ہوں: امیتابھ بچن

اپ کی ڈیوائس پر پلے بیک سپورٹ دستیاب نہیں

میں دلیپ کمار سے کوسوں پیچھے ہوں: امیتابھ

Image caption امیتابھ بچن اور دلیپ کمار کے مداح ہمیشہ دونوں کا موازنہ کرتے رہے ہیں

اپنے زمانے کے معروف مکالمہ نگار اور سکرپٹ رائٹر قادر خان نے امیتابھ کی تعریف کرتے ہوئے کہا کہ وہ لاجواب اداکار ہیں لیکن وہ دلیپ کمار سے دو چیزوں میں پیچھے ہیں۔

انھوں نے بی بی سی سے بات کرتے ہوئے کہا: میں نے امیتابھ سے کہا کہ وہ اپنے اندر دلیپ کمار والی ہنسی اور ان کے رونے کی ادکاری لائیں کیونکہ مرد کا رونا اور ہنسنا دو بے حد اہم چیزیں ہیں کیونکہ نہ تو وہ روتا ہوا اچھا لگتا ہے اور نہ ہی ہنستا ہوا لیکن دلیپ کمار نے ان دونوں چیزوں کو اس خوبی کے ساتھ نبھایا کہ لوگ ان کے دیوانے ہو گئے۔

انھوں نے مزید کہا: امیتابھ نے رونے اور مسکرانے کے میدان میں دلیپ کمار سے بہت کچھ سیکھا ہے۔

جب امیتابھ بچن سے اس بابت بی بی سی کے نمائندے نے دریافت کیا تو انہوں نے کہا: میری ایشور سے یہی دعا ہے کہ میں دلیپ کمار سے ہمیشہ پیچھے رہوں، کوسوں پیچھے رہوں۔ میں نے ان کو ہمیشہ اپنا آئیڈیئل مانا ہے۔ اداکاری کے شعبے میں میں نے کبھی یہ نہیں سوچا کہ میں ان سے اچھا ہوں۔ میں ہمیشہ سمجھتا ہوں کہ میں ان کے قریب پہنچ ہی نہیں سکتا۔

’فیک ویڈیو‘ پر امیتابھ برہم

Image caption امیتابھ بچن ایک زمانے سے سیاست سے دور ہیں

ان دنوں امیتابھ بچن غصے میں ہیں۔ ان کے غصے کا سبب انٹرنیٹ پر جاری کیا گیا ان کا ایک جعلی ویڈیو ہے۔ انھوں اس کے خلاف فیس بک پر کھل کر اپنی ناراضگی ظاہر کی ہے۔

دراصل، امیتابھ بچن نے سال 2007 میں ایک قومی اخبار کے لیے ایک ویڈیو مہم کی تھی۔ امیتابھ کا الزام ہے کہ کسی نے ان کے اس ویڈیو کو غلط طریقے سے استعمال کرکے گجرات کے وزیر اعلیٰ نریندر مودی کے پروپیگنڈے کا ویڈیو تیار کر لیا ہے۔

امیتابھ بچن نے ٹویٹر پر پوسٹ کیا کہ اصل ویڈیو میں انہوں نے جو کہا تھا اس مواد کو کسی نے مودی کی تشہیر کے مواد کے لیے استعمال کر لیا، جو بہت غلط بات ہے۔

امیتابھ نے لکھا: ’میں واضح کرنا چاہتا ہوں کہ یہ ایک غیر قانونی بات ہے۔ میں حیران ہوں کہ کوئی اس طرح کی حرکت کیسے کر سکتا ہے۔ میں نے اپنی ڈیجیٹل ٹیم کو کہا ہے کہ وہ پتہ لگائیں کہ یہ ویڈیو کس نے اور کہاں پر تیار کی ہے۔ یہ کاپی رائٹ کی سخت خلاف ورزی ہے۔ میں اس بات سے بے حد غصے میں ہوں۔‘

امیتابھ نے مزید لکھا: ’میری آواز کا جس غلط طریقے سے استعمال کیا گیا ہے وہ ہلا دینے والا ہے۔ جس کسی نے یہ حرکت کی ہے میں اس کے خلاف سخت قدم اٹھاؤں گا۔‘

پرینکا چوپڑہ کا اجتناب

Image caption پرینکا چوپڑہ نے شاہ رخ کے ساتھ کئي فلموں میں اہم کردار ادا کیا ہے

ایک وقت تھا جب پرینکا چوپڑا ہر جگہ شاہ رخ خان کی تعریف کرتے نہیں تھكتي تھیں اور انہیں اپنا استاد کہتی تھیں لیکن شاید اب وقت بدل گیا ہے۔

فلم ’زنجیر‘ کے پروموشن کے دوران جب پرینکا سے پوچھا گیا کہ ان کے سنگنگ کیریئر میں شاہ رخ نے ان کی کتنی حوصلہ افزائی کی تو پرینکا بربڑاتے ہوئے بولیں: شاہ رخ کی بات کوئی نہیں کرے گا۔ میں آپ کو کچھ لکھنے کا موقع نہیں دینا چاہتی۔

شاہ رخ خان کے ساتھ پرینکا نے ’ڈان‘ اور ’ڈان۔2‘جیسی ہٹ فلمیں کی ہیں لیکن اب وہ ان کے بارے میں کوئی بات ہی نہیں کرنا چاہتیں۔

اس کا سبب یہ بھی ہو سکتا ہے کہ گذشتہ دنوں ان دونوں اداکاروں میں بڑھتی قربت کے چرچے بھی تو تھے۔

گمشدہ عامر خان کی تلاش

Image caption دھوم-3 کی شوٹنگ کے بعد عامر خان راڈار سے باہر تنہائی کا لطف لے رہے ہیں

عامر خان بغیر کسی کو بتائے چھٹی پر چلے گئے ہیں۔ فلم ’دھوم 3‘ کی شوٹنگ سے نمٹنے کے بعد عامرخان اکیلے ہی چھٹی منانے آسٹریلیا چلے گئے۔

اس چھٹی پر کوئی بھی عامر خان سے کسی بھی طرح سے کوئی رابطہ نہیں کر پا رہا ہے۔ عامر نہ اپنے فیس بک اور نہ ہی اپنے ٹوئٹر اکاؤنٹ پر فعال ہیں۔

ماہرین کے مطابق عامر کے پلان کی معلومات صرف ان کے عزیز دوست اور ’دھوم 3‘ کے ہدایت کار آدتیہ چوپڑہ اور بیوی کرن راؤ کو ہی ہے۔

اس سے پہلے بھی عامر '’ ایڈیٹس‘ کی ریلیز سے پہلے بغیر کسی کو بتائے غائب ہو گئے تھے۔

اسی بارے میں