شو کے بعد کیا کر رہے ہیں بگ باس کے حریف؟

تصویر کے کاپی رائٹ Colors
Image caption شو کے دوران كشال اور گوہر نے تو ایک دوسرے سے محبت کا اظہار بھی کر لیا تھا

شاید آپ کو اس بات کی معلومات میں قدرے دلچسپی ہو کہ بھارت کے معروف ریئلٹی شو بگ باس -7 میں حصہ لینے والے اہم حریفوں کی زندگی میں شو کے بعد کیا تبدیلی آئی ہے؟

کیا شو کے دوران بے حد قربت کا اظہار کرنے والے ارمان کوہلی اور تنيشا مکھرجی یا گوہر خان اور كشال ٹنڈن کے درمیان اب بھی ویسے ہی رشتے قائم ہیں یا یہ محض شو کو شہرت دینے کی منصوبہ بندی تھی؟

كشال اور گوہر نے تو شو کے دوران ایک دوسرے سے محبت کا اظہار بھی کر لیا تھا۔ بی بی سی کے ودت مہرا نے آخر تک رہنے والے چھ افراد سے بات کرنے کی کوشش کی۔

اس بابت كشال ٹنڈن نے بتایا: ’بگ باس کے دوران مجھے اور گوہر کو ایک دوسرے سے محبت ہو گئی۔ ہم دونوں اب بھی ایک ساتھ ہیں اور ہمارے درمیان معاملات کافی اچھے چل رہے ہیں جس سے ہم دونوں کافی خوش ہیں۔‘

دوسری جانب گوہر خان نے ذاتی تعلقات کے سلسلے میں جواب دینے سے انکار کر دیا۔ لیکن شو کے ایک مقبول حریف وی جے اینڈی کا جواب کچھ یوں تھا: ’اگر آپ مجھ سے پوچھیں گے کہ كشال اور گوہر کے درمیان کیا ہے یا ارمان اور تنيشا کے درمیان کیا ہے، تو میں یہ کہوں گا ان کے درمیان جو کچھ بھی ہو یا تو وہ خود جانیں یا پھر اوپر والا جانے۔‘

تصویر کے کاپی رائٹ Colors
Image caption ارمان اور تنیشا سے رابطہ نہیں ہو سکا تاہم ان میں لوگوں کی دلچسپیاں برقرار ہیں

اس سلسلے میں ارمان کوہلی سے رابطہ نہیں ہو پایا۔ اینڈی کے مطابق: ’جب ایک گھر میں بہت سارے لوگ بند ہوتے ہیں تو ان کے درمیان دوستی بھی بڑھتی ہے اور پیار بھی ہوتا ہے۔ لیکن اگر کوئی پہلے سے ہی یہ سوچ کر آیا ہو کہ اسے کچھ ایسا کرنا ہے جس سے شو کی یا اس کی ٹی آر پی بڑھے تو میں اس سلسلے میں کچھ نہیں کہہ سکتا۔‘

شو کے بعد اس میں حصہ لینے والوں کی زندگی میں کیا تبدیلی آئی؟ کیا شو نے ان حریف کی زندگی کو اور بہتر بنایا؟ بگ باس 7 کی فاتح گوہر خان کہتی ہیں: ’لوگوں کا بہت سارا پیار مل رہا ہے اور لوگ میرا کام سراہ رہے ہیں۔ میں خود کو بہت ہی خوش قسمت سمجھتی ہوں۔‘

فلم ’راکٹ سنگھ‘ اور ’عشق زادے‘ جیسی فلموں میں کام کرنے والی گوہر نے شو کے بعد فلموں کی آفر کے بارے میں بتایا: ’بگ باس کے بعد چیزیں اچھی ہو رہی ہیں۔ اب اپنے لیے کم وقت ملتا ہے۔ اب میرا پورا دھیان کام پر ہے۔‘

تصویر کے کاپی رائٹ Colors
Image caption ارمان اپنے مزاج اور اینڈی اپنے مزاح کے لیے بے حد مقبول ہوئے

تاہم كشال ٹنڈن کا کہنا ہے کہ ایسا بالکل نہیں ہے کہ بگ باس سے ان کی زندگی بالکل ہی بدل گئی ہو۔ وہ کہتے ہیں: ’بگ باس کے بعد سب کچھ پہلے جیسا ہی ہے، خاندان اور دوستوں کے ساتھ سب اچھا چل رہا ہے۔ آج کل میں کام کے سلسلے میں کئی لوگوں سے مل رہا ہوں۔‘

اینڈی نے حال ہی میں اس سال فلم فیئر ریڈ کارپیٹ کی میزبانی کی۔ وہ کہتے ہیں: ’بگ باس کے بعد میں بہت سارے شوز کر رہا ہوں۔ مجھے بہت سارے مواقع مل رہے ہیں۔ میرے پاس بہت ساری فلموں کی آفرز بھی آ رہے ہیں اور جلد ہی آپ مجھے فلموں میں بھی دیکھیں گے۔‘

شو کے ایک اور دعوےدار پہلوان سنگرام سنگھ کہتے ہیں: ’بگ باس کے بعد مجھ سے کافی لوگوں نے رابطہ کیا۔ ابھی میرے پاس پانچ فلموں کی آفرز آئے ہیں۔ لیکن میں وہی کام کروں گا جو میری شبیہ کے مطابق ہو۔‘

ان سب کے دعووں کے باوجود ہمارے نامہ نگار کا کہنا ہے کہ بگ باس کے اس سے پہلے کے ورژن کے فاتح جیسے وندو دارا سنگھ، جوہی پرمار، راہل رائے اور آروشي ڈھولکیا کی کاروباری زندگی میں کوئی ایسی تبدیلی نہیں آئی جس سے ان کے کریئر کی سمت ہی بدل جائے۔

اسی بارے میں