عمر اکمل کے وارنٹ گرفتاری جاری

تصویر کے کاپی رائٹ BBC World Service
Image caption عمر اکمل کو لاہور کے علاقے گلبرگ کی فردوس مارکیٹ میں ٹریفک سنگل توڑنے اور وارڈن سے دست درازی پر حراست میں لیا گیا تھا

پاکستان کرکٹ ٹیم کے وکٹ کیپر عمر اکمل کے لاہور کی ایک مقامی عدالت کے جج امتیاز انور نے وارنٹ گرفتاری جاری کر دیے ہیں۔

عمر اکمل کے خلاف جمعرات کو ٹریفک قوانین کی خلاف ورزی اور ٹریفک وارڈن سے جھگڑے پر مقامی عدالت میں کیس کی سماعت ہوئی۔

عمر اکمل آج کل ایشیا کپ کے سلسلے میں بنگلہ دیش میں ہیں اور انھوں نے جمعرات کو افعانستان کے خلاف جارحانہ انداز میں کھیلتے ہوئے سات چوکوں اور تین چھکوں کی مدد سے 89 گیندوں پر 102 رنز بنائے۔

ٹریفک وارڈن کیس میں عدالت نے عمر اکمل کو طلب کیا تھا چونکہ وہ ملک میں موجود نہیں لہذا عدالت نے انھیں 11 مارچ کو پیش ہونے کا حکم دیا۔

ایشیا کپ کھیلنے والی پاکستانی ٹیم آٹھ مارچ کو واپس آئے گی اور دس مارچ کو دوبارہ بنگہ دیش میں ہونے والے ورلڈ ٹی ٹونٹی کے لیے روانہ ہو گی۔

عمر اکمل ٹی ٹونٹی ٹیم کا بھی حصہ ہیں اس لیے 11 مارچ کی سماعت میں بھی ان کی عدالت میں حاضری کا امکان نہیں ہے۔

خیال رہے کہ عمر اکمل کو یکم فروری کو لاہور کے علاقے گلبرگ کی فردوس مارکیٹ میں ٹریفک سنگل توڑنے اور وارڈن سے دست درازی پر حراست میں لیا گیا تھا اور ایک رات حراست میں رہنے کے بعد انھیں ایک لاکھ روپے کی ضمانت پر رہا کر دیا گیا۔

عمر اکمل اپنے خلاف ان الزامات کی تردید کرتے ہیں اورو ان کے مطابق ٹریفک وارڈن نے ان پر تشدد کیا تھا۔

اسی بارے میں