بالی وڈ راؤنڈ اپ

اپ کی ڈیوائس پر پلے بیک سپورٹ دستیاب نہیں

کمایا نہیں گنوایا ہے: عامر خان

تصویر کے کاپی رائٹ AFP
Image caption عامر خان کی آنے والی فلم پی کے ہے جو اس سال کے اخیر میں ریلیز ہو سکتی ہے

معروف اداکار عامر خان اپنے اصولوں کے لیے جانے جاتے ہیں خواہ وہ سال میں صرف ایک ہی فلم میں کام کرنے کا فیصلہ ہو یا پھر پیسے کمانے کے طریقے کا۔

حال ہی میں عامر خان سے جب ان کی آمدنی کے متعلق سوال پوچھا گیا تو عامر نے بہت صاف انداز میں کہا: ’میں صرف اچھے کام کے ہی پیسے لیتا ہوں۔ پیسے لے کر میں خراب کام بھی تو کر سکتا ہوں۔ اگر میں کسی چیز میں اپنا ایک سال دے رہا ہوں تو پیسے تو لوں گا ہی۔‘

عامر یہ بھی کہتے ہیں کہ ٹی وی شو ’ستیہ مے و جیتے‘ میں کمائی کے لحاظ سے وہ نقصان اٹھا رہے ہیں۔ عامر کا کہنا ہے کہ میں اشتہار کرکے جتنے پیسے کماتا ہوں اس سے اتنے نہیں کما رہا ہوں۔ ایک لحاظ سے میں نے تو گنوایا ہے لیکن میں کام کرتے وقت یہ سب نہیں سوچتا۔

سماجی مسائل کو اجاگر کرنے والا عامر خان کا ٹی وی پروگرام ’ستیہ مے و جیتے‘ ان دنوں بحث کا موضوع ہے۔

بہتر سکرپٹ کا انتظار: کاجول

تصویر کے کاپی رائٹ AFP
Image caption کاجول نے متعدد اچھی فلمیں دی ہیں

اپنے زمانے کی معروف اداکارہ کاجول اپنے دو بچوں کی دیکھ بھال کو اپنی پہلی ترجیح بتاتی ہیں تاہم انھیں پھر سے پردۂ سیمیں پر آنے کے لیے ایک بہت اچھی سکرپٹ کا انتظار ہے۔ ایسے میں ان کے مداح کو مزید انتظار کرنا پڑ سکتا ہے۔

کیا کاجول دوبارہ کسی فلم میں نظر آئیں گی؟ اس سوال کے جواب میں وہ کہتی ہیں: ’بالکل، لیکن سکرپٹ اچھی ہونی چاہیے۔ میں یہ نہیں کہہ رہی ہوں کہ میں کسی خاتون پر مرکوز فلم میں ہی کام کروں گی کیونکہ کسی فلم کا ہر کردار اہم ہوتا ہے لیکن اب جو بھی فلم کروں گی اس کی کہانی اچھی ہی ہونی چاہیے۔‘

کاجول نے یہ بھی عندیہ دیا ہے کہ شاید اس سال کے اواخر تک وہ اپنے گھریلو پروڈکشن ہاؤس کی کسی فلم سے دوبارہ اداکاری کی جانب لوٹیں۔

’شاہ رخ خان کے ساتھ کام کی خواہش ہے‘

تصویر کے کاپی رائٹ Hoture Images
Image caption سنی لیونی کی نئی فلم راگنی ایم ایم ایس 2 ہے

بالغ فلموں سے شہرت پانے والی اداکارہ سنی ليوني اپنی حالیہ ریلیز ہونے والی فلم ’راگني ایم ایم ایس 2‘ میں نظر آ رہی ہیں۔

سنی اس سے پہلے ’جیک پاٹ اور ’جسم 2‘ میں اداکاری کی ہے لیکن ان کی دلی خواہش ہے وہ بالی وڈ کے سپر سٹار شاہ رخ خان کے ساتھ بھی کام کر سکیں۔

شاہ رخ خان کے ساتھ کام کرنے کی اپنی خواہش کا اظہار کرتے ہوئے سنی نے کہا: ’پتہ نہیں مجھے یہ موقع ملے گا یا نہیں۔ اگر ملا تو بہت اچھا ہوگا۔ بہر حال شاہ رخ کے ساتھ کام کرنے کی خواہش رکھتی ہوں۔‘

تاہم سنی نے یہ بھی کہا کہ ہندی فلموں میں انھوں نے پسندیدہ لوگوں کی کوئی فہرست نہیں بنائی ہے۔ سنی کا کہنا ہے: ’میری کوئی فہرست نہیں ہے۔ اگر مجھے بڑے ہدایت کاروں کے ساتھ کام کرنے کا موقع ملے تو اچھا ہے ورنہ میں انہی لوگوں کے ساتھ کام کرنے کے لیے تیار ہوں جو پوری طرح سے پروفیشنل ہیں اور یہ جانتے ہیں کہ وہ آخر کیا حاصل کرنا چاہتے ہیں۔ میں صرف فلمیں کرنا چاہتی ہوں۔‘

ٹوئٹر پر ملا پیسہ

تصویر کے کاپی رائٹ Meenal Agarwal
Image caption رجت کپور نے کئی یادگار کردار ادا کیے ہیں

اداکار، فلم ساز اور ہدایت کار رجت کپور کی نئی فلم ’آنکھوں دیکھی‘ اسی ہفتے ریلیز ہوئی ہے۔

واضح رہے کہ ایک وقت ایسا بھی تھا جب رجت یہ طے کر لیا تھا کہ وہ یہ فلم نہیں بنائیں گے کیونکہ انہیں کوئی پروڈیوسر نہیں مل رہا ہے۔

پھر یہ کیسے ہوا کہ فلم کو فنڈ مل گیا۔ رجت نے اس کی دلچسپ کہانی بیان کرتے ہوئے بتایا: ’میں نے اپنے ٹوئٹر اکاؤنٹ پر لکھا کہ میں فلمیں بنانا بند کر رہا ہوں کیونکہ میں فلم سازوں سے پریشان ہوں۔ اب صرف ڈرامہ ہی کروں گا۔ اس پر کسی نے مجھے پیغام بھیجا کہ میں آپ کا فین ہوں آپ فلم بنائیے میں پیسے لگاؤں گا۔ میں نے ان سے کہا کہ آپ سکرپٹ دیکھ لیجیے۔ اگر دل نہ بدلے تو پھر آگے بات کریں گے۔ انہوں نے کہا سب اچھا ہے آپ ایگریمنٹ بنائیے۔ اس طرح مجھے پیسہ ٹوئٹر سے مل گیا۔‘

رجت کپور کا یہ حسین اتفاق دوسرے ہدایتکاروں کے لیے تحریک کا سبب بن سکتا ہے۔

اسی بارے میں