دلیپ کمار کی طبیعت ناساز، ہسپتال میں داخل

تصویر کے کاپی رائٹ afp getty
Image caption دلیپ کمار اسی ماہ اپنا 93 ویں سالگرہ منانے والے ہیں

بر صغیر کے معروف اداکار دلیپ کمار کو ممبئی کے ليلاوتی ہسپتال میں داخل کرایا گیا ہے۔

دلیپ کمار پر کتاب لکھنے والی مصنفہ اور ان کی قریبی دوست ادے تارا نے بی بی سی کو بتایا کہ ان کے پھیپھڑوں میں انفیکشن کی وجہ سے انھیں ہسپتال لایا گيا ہے۔

ادے تارا نے بتایا کہ ان کی ہسپتال کے ڈاکٹروں سے گفتگو ہوئی ہے اور ان کا کہنا ہے کہ دلیپ کمار کو نمونیا کے علاج کے لیے بھرتی کیا گیا ہے۔

انھیں سنیچر اور اتوار کی درمیانی شب ليلاوتی ہسپتال میں داخل کرایا گیا۔ انھیں کھانسی اور زکام بھی ہے۔

ڈاکٹروں نے بتایا کہ دلیپ کمار کو اینٹی بایوٹک دوائیں دی جا رہی ہیں۔

اطلاعات کے مطابق 92 سالہ دلیپ کمار طویل عرصے سے کسی نہ کسی عارضے میں مبتلا رہے ہیں۔ تاہم حال میں سلمان خان کی بہن ارپتا کی شادی میں انھیں صحیح و سالم دیکھا گیا تھا۔

تصویر کے کاپی رائٹ Madhur Bhushan
Image caption دلیپ کمار نے بالی ود میں اداکاری کا ایک معیار مقرر کیا ہے

ادے تارا کے مطابق دلیپ کمار کی طبیعت تشویشناک حد تک خراب نہیں ہے اور انھیں پرائیویٹ کمرے میں رکھا گیا ہے۔

یاد رہے کہ گذشتہ سال ستمبر میں دل کا دورہ پڑنے کے بعد بھی یوسف خان عرف دلیپ کمار کو ہسپتال میں داخل کرایا گیا تھا۔

جبکہ حال ہی میں سوشل میڈیا پر دلیپ کمار کے انتقال کی افواہ پھیلی تھی جس کے بعد ان کی بیوی سائرہ بانو نے لان میں بیٹھے ہوئے ان کی ایک تصویر ٹوئٹر پر شیئر کرکے کہا تھا کہ وہ اچھے اور تندرست ہیں۔

اسی بارے میں