’اپنے مستقبل کے بارے میں سنجیدہ ہوں‘

سنی لیون تصویر کے کاپی رائٹ T SERIES
Image caption سنی لیون کی فلم ’راگنی ایم ایم ایس2‘کافی پسند کی گئی تھی

امریکی پورن فلموں میں اداکاری سے بالی وڈ میں قدم رکھنے والی اداکارہ سنی لیون کا کہنا ہے کہ وہ ماضی میں کافی غلطیاں کرچکی ہے لیکن مستقبل کے بارے میں سنجیدہ ہیں۔

سنی لیون کی نئی فلم ’ایک سہیلی لیلا‘ جلد ہی ریلیز ہونے والی ہے۔ اسی فلم کی تشہیر کے موقع پر انھوں نے کہا کہ وہ بالی وڈ فلم انڈسٹری سے ابھی بھی پوری طرح سے واقف نہیں ہیں۔

سنی لیون کی پہلی فلم ’جیک پاٹ‘ تو فلاپ ہوگئی تھی لیکن ان کی فلم ’راگنی ایم ایم ایس 2‘ نے اچھا کاروبار کیا تھا اور اسی فلم کے آئٹم نمبر ’بے بی ڈال‘ سے انہیں کافی مقبولیت حاصل ہوئی۔ سنی لیون کا خیال ہے کہ بالی وڈ میں اپنے قدم جمانے کے لیے ابھی انہیں مزید محنت کرنے کی ضرورت ہے۔

سنی لیون نے اپنی شروعاتی فلموں کا حوالہ دیتے ہوئے کہا ’میں نے بعض غلطیاں کی ہیں لیکن وہ صرف اس لیے کیونکہ میں بالی وڈ میں نئی تھی۔‘

ان کا مزید کہنا تھا ’جب میں نے جیک پاٹ فلم میں کام کیا اور وہ فلم بری طرح فلاپ ہوگئی تو میں کافی ڈر گئی تھی۔ میرے لیے راگنی ایم ایم ایس 2 کا ہٹ ہونا بے حد ضروری تھا ورنہ میرا اعتماد ختم ہوجاتا۔‘

تصویر کے کاپی رائٹ t Series
Image caption سنی لیون کا کہنا ہے کہ وہ ابھی بالی وڈ کو گہرائی سے نہیں سمجھتی ہیں

سنی لیون نے اس بات کا اعتراف کیا کہ انھوں نے فلموں کا انتخاب کرتے وقت بعض غلطیاں کی لیکن ساتھ یہ بھی کہا کہ وہ ان غلطیوں سے سبق سیکھ رہی ہیں۔

ان کا کہنا تھا ’میری نئی فلموں میں آپ دیکھیں گے کہ میں نے بے حد محنت کی ہے۔ ماضی میں میں نے کچھ بھی کیا ہو لیکن میں اپنے مستقبل کے حوالے سے کافی سنجیدہ ہوں۔‘

سنی لیون نے ابھی تک ’ جیک پاٹ‘، ’ راگنی ایم ایم اس2‘ ، ’شوٹ آؤٹ ایٹ وڈالا‘ ، ’لاٹری‘ اور ’ جسم 2‘ جیسی فلموں میں کام کیا ہے۔ بالی وڈ میں اداکاری کرنے سے پہلے وہ فحش فلموں میں کام کرتی تھیں اور انڈیا میں انھوں نے ٹی وی پر نشر ہونے والے مقبول ترین شو ’بگ باس‘میں حصہ لیا تھا جس کے بعد انھوں نے بالی وڈ کا سفر شروع کیا۔

سنی لیون اپنی اداکاری سے زيادہ اپنے آئٹم سانگز کے لیے مقبول ہیں۔

اسی بارے میں