دوستی، محبت اور اب شادی

تصویر کے کاپی رائٹ Getty
Image caption دونوں اداکاروں نے ایک ساتھ تین فلموں میں کام کیا ہے

بالآخر بالی وڈ اداکار رنبیر کپور نے معروف اداکارہ قطرینہ کیف کے ساتھ اپنی شادی کی بات پر مہر تصدیق ثبت کر دی۔

اور اب تقریباً چار سال سے جاری ان کی دوستی پروان چڑھتے چڑھتے شادی کے مرحلے تک پہنچ رہی ہے۔

ایک بھارتی اخبار کو دیے جانے والے انٹرویو میں رنبیر کپور نے شادی کی بات تسلیم کی جس سے اب یہ امید کی جا سکتی ہے کہ ان دونوں کی شادی کے بارے میں ہونے والی قیاس آرائیوں میں کمی واقع ہو جائے گي۔

رنبیر کپور نے آنند بازار پتریکا نامی اخبار میں شائع اپنے انٹرویو میں کہا: ’اس سال ہم دونوں بہت مشغول ہیں تو شادی کے لیے وقت نہیں نکل پائے گا۔ لیکن ہم نے اگلے سال کے آخر تک شادی کے رشتے میں بندھنے کا فیصلہ کر لیا ہے اور ہم دونوں اس پر راضی ہیں۔‘

تصویر کے کاپی رائٹ Getty
Image caption دونوں کی پہلی فلم عجب پریم کی غضب کہانی تھی

رنبیر نے مزید کہا: ’اب ہم دونوں تیار ہیں اور اگر ہم اب بھی اس رشتے کو قبول نہیں کریں گے تو یہ اس رشتے کی توہین ہوگی۔‘

رنبیر نے کہا: ’میں 33 سال کا ہوں اور یہ شادی کی صحیح عمر ہے، ہاں گپ شپ میں کیا کہا جاتا ہے اس سے میرا کوئی واسطہ نہیں ہے۔‘

رنبیر نے بتایا کہ یہ دونوں کے لیے ایک بڑا فیصلہ ہے جسے وہ خوب سوچ سمجھ کے لینا چاہتے تھے۔

حال ہی میں رنبیر اور کیٹ نے ممبئی کے باندرا کے علاقے میں ایک ساتھ رہنا شروع کر دیا تھا جس سے ان دونوں کی شادی کے بارے میں قیاس آرائیاں تیز ہو گئی تھیں۔

تصویر کے کاپی رائٹ Prakash Jha Productions
Image caption فلم راج نیتی ان دونوں کی دوسری فلم تھی

جبکہ گذشتہ دنوں رنبیر نے قطرینہ کیف کو اپنے اہل خانہ سے ایک ریستوراں میں ڈنر پر ملوایا تھا اور اس کی تصویریں بھارتی اخباروں کی زینت بنی تھیں۔

دونوں نے ایک ساتھ اب تک تین فلمیں کی ہیں۔ پہلی فلم ’عجب پریم کی غضب کہانی‘ سنہ 2009 میں آئی تھی۔ اس کے بعد دونوں نے ’راجنیتی‘ میں ساتھ کام کیا اور پھر ’بامبے ٹاکیز‘ میں ساتھ نظر آئے۔

اسی بارے میں