موبائل ایپ کے ذریعے مادھوری سے رقص سیکھیں

بالی وڈ کی ’دھک دھک گرل‘ مادھوری دکشت اب رقص کی استاد بھی بن گئی ہیں۔ انھوں نے حال ہی میں اس کے لیے ایک خاص اور نیا موبائل ایپ ’ڈانس ود مادھوری‘ لانچ کیا ہے جس کے ذریعے وہ اب رقص سكھائیں گي۔

گزشتہ برس مادھوری نے اپنی ’آن لائن ڈانسنگ اکیڈمی‘ کھولی تھی اور یہ ایپ اسی سمت میں ایک اور قدم ہے۔

مادھوری کا کہنا ہے کہ ’یہ موقع ان سب کے لیے ہے جو واقعی ڈانس سیکھنا چاہتے ہیں یا پھر ڈانس کے ذریعہ ورزش کرنا چاہتے ہیں۔‘

اس ایپ کے لانچ کے موقع پر مادھوری دکشت اور ان کے شوہر ڈاکٹر شری رام نینے کے علاوہ فلم ساز سبھاش گھئی، اداکار جیکی شیروف اور معروف كوريوگرافر سروج خان بھی موجود تھیں۔

مادھوری کی حالیہ فلمیں ’گلاب گینگ‘ اور ’ڈیڑھ عشقیہ‘ باکس آفس پر کچھ خاص کاروبار نہیں کر پائی تھیں اور 2015 میں بھی مادھوری کی کوئی فلم نہیں آ رہی ہے۔

ایسی صورت میں مادھوری نے ٹی وی کا سہارا لیا اور رقص کے لیے معروف ٹی وی شو ’جھلک دكھلا جا‘ میں بطور جج شرکت کی۔

اب وہ اپنے فن رقص کی تشہیر اور اسے پیشہ ورانہ طور پر استعمال کرنے کے لیے آن لائن سروس کا استعمال کرنے جا رہی ہیں۔

تصویر کے کاپی رائٹ Agency
Image caption سنہ 1999 میں فلمی دنیا سے قدرے فاصلے پر جانے والی مادھوری اب ایک بار پھر اپنے کریئر کی دوسری اننگز کا آغاز کر چکی ہیں

مادھوری کے شوہر ڈاکٹر نینے نے کہا ’ہم اسے فیس بک جیسا بنانا چاہتے ہیں۔ یہ ایپ مفت ہے اور آپ اس پر اپنا پروفائل بھی اپ لوڈ کر سکتے ہیں، جس کے ذریعے ڈانسرز کو نوکری بھی مل سکتی ہے۔‘

مادھوری کہتی ہیں ’ڈانس ود مادھوری‘ ایپ پر صرف وہ ہی نہیں بلکہ اور بھی کئی كوريوگرافرز جیسے ٹیرینز لوئیس، ’اے بي سي ڈي‘ والے سلمان وغیرہ موجود ہیں اور وہ لڑکوں کو رقص سکھائیں گے۔

ان کے مطابق اس ایپ پر لوگ اپنے ڈانس کا ویڈیو بناکر اپ لوڈ بھی کر سکتے ہیں اور اس اس کا سب سے بڑا فائدہ یہ ہے کہ کوریوگرافرز ان ویڈیوز کو دیکھ کر ان کی اصلاح کر یں گے اور انہیں نئی تجاویز دیں گے۔

’اچھا ڈانس کرنے پر آپ کو اس ایپ کے ذریعہ کسی ڈانس گروپ کے لیے منتخب بھی کیا جا سکتا ہے۔‘

’ڈانس ود مادھوری‘ نامی یہ ایپ فی الحال آن لائن دنیا میں زیادہ مقبول نہیں لیکن ڈاکٹر نینے کہتے ہیں ’کسی بھی نئی چیزکو بڑا ہونے میں وقت لگتا ہے، جلد ہی ہمارا ایپ بھی لوگوں کو پسند آئے گا۔‘

اسی بارے میں