انڈسٹری کے ’رابن ہڈ‘ کو نئے چہرے کی تلاش

بالی وڈ میں ہیروز کے مقابلے ہیروئنوں کا کیا مقام ہے اس کا اندازہ اس بات سے لگایا جا سکتا ہے کہ فلم ’سلطان‘ کے فلمساز نے فلم کی شوٹنگ ہیروئن کے انتخاب کے بغیر ہی شروع کر دی مطلب یہ کہ ابھی اس بات کا فیصلہ تک نہیں ہوا ہے کہ فلم کی ہیروئن کون ہوگی؟

سلمان خان کے ساتھ فلم کی شوٹنگ شروع ہو چکی ہے۔ خبریں ہیں کہ فلم کے ہدایت کار پرینیتی چوپڑہ کو سائن کرنا چاہتے ہیں لیکن سلمان خان فلم میں زیادہ دلچسپی لے رہے ہیں اور بہت سوچ سمجھ کر ہیروئن کا انتخاب کرنا چاہتے ہیں۔

بالی وڈ راؤنڈ اپ سننے کے لیے کلک کریں

غالباً اس فلم کے لیے کسی نئے چہرے کی تلاش جاری ہے۔ اب دیکھتے ہیں کہ انڈسٹری کے ’رابن ہڈ‘ کی مہربانیاں اب کس کی قسمت کو چمکاتی ہیں؟ ویسے فلم ’سلطان‘ اگلے سال عید کے موقعے پر ریلیز کیے جانے کا منصوبہ ہے۔

تصویر کے کاپی رائٹ beena
Image caption انوپم کھیر عامر کے خان کے ساتھ فلم دل میں نظر آئے تھے

اس ہفتے کی دلچسپ خبروں میں سے ایک خبر یہ بھی ہے کہ انوپم کھیر جو پچھلے کچھ ہفتوں میں اپنی ’سیاسی سرگرمیوں‘ کے لیے سرخیوں میں تھے اور ’عدم رواداری‘ کی بحث میں انھوں نے عامر خان کو خوب لتاڑا تھا، اب ان کے ساتھ دوستی کی پینگیں بڑھانے کی کوششیں کر رہے ہیں۔

انوپم کھیر کا کہنا ہے ’عامر خان میرے اچھے دوست ہیں، ایک بڑے پروڈیوسر اور ہیرو ہیں اور میں ان کے ساتھ کام کرنا چاہتا ہوں۔‘

انوپم اب یہ کہہ رہے ہیں کہ عامر کے بیان کے بارے میں انھیں اپنے ڈرائیور سے پتہ چلا اور جذبات میں آ کر انھوں نے ٹوئٹ کر ڈالی۔

تصویر کے کاپی رائٹ bbc
Image caption کاجول کا کہنا ہے کہ ہیروئنوں پر خوبصورت نظر آنے کا بہت دباؤ رہتا ہے

حالانکہ انوپم اب بھی اپنے موقف پر قائم رہنے کی بات کر رہے ہیں لیکن جس طرح سے وہ اپنے ٹوئٹ کی صفائی پیش کرنے کی کوشش کر رہے ہیں اس سے لگتا ہے کہ وہ یہ سمجھ چکے ہیں کہ پانی میں رہ کر مگر مچھ سے بیر ٹھیک نہیں۔ ویسے بھی انوپم کھیر سنہ 1990 کے بعد سے عامر کے ساتھ کوئی فلم نہیں کر سکے۔ پانچ سال کے بعد فلم ’دل والے‘ سے واپس انڈسٹری کا رخ کرنے والی اداکارہ کاجول کا کہنا ہے کہ بالی وڈ میں اداکاراؤں پر خوبصورت لگنے کا دباؤ کچھ زیادہ ہی ہوتا ہے جس کی وجہ سے ان کے ٹیلنٹ کو نظر انداز کیا جاتا ہے۔

کاجول کا خیال ہے کہ ہیروئنوں کو ہمیشہ ایک خاص انداز میں دکھانے کی کوشش کی جاتی ہے اور عام زندگی میں بھی ان پر ہیروئن کی طرح نظر آنے کا دباؤ رہتا ہے جو غلط ہے۔

لگتا ہے کہ کاجول بھول گئی ہیں کہ یہ بات انڈسٹری تک محدود نہیں بلکہ یہ ایک سماجی سوچ اور رویہ ہے۔ جب کبھی عورتوں پر مبنی یا عورت کے کردار کے گرد فلم بنائی جاتی ہے تو اسے وہ کامیابی نہیں ملتی جو مرد کے مرکزی کردار والی فلموں کو ملتی ہے۔

تصویر کے کاپی رائٹ Getty
Image caption سلمان خان کے بری ہونے پر ٹوئٹر پر خوب گرماگرم بحث نظر آئی

یہی وجہ ہے کہ آج بھی انڈسٹری میں ہیروئنوں کو ہیروز کے مقابلے کم فیس ادا کی جاتی ہے کیونکہ فلمسازوں کا خیال ہے کہ فلم ہیروز کی وجہ سے چلتی ہے۔ ’ہٹ اینڈ رن‘ کیس میں عدالت کی جانب سے سلمان خان کی رہائی سے ان کے گھر والے تو خوش ہیں ہی ساتھ ہی ان کے مداح اور انڈسٹری کے دوست بھی خاصے خوش نظر آ رہے ہیں۔

انڈسٹری کے ہر چھوٹے بڑے فنکار نے سلمان کے گھر جا کر انھیں مبارک باد دی۔ بالی وڈ کنگ شاہ رخ خان بھی اپنی خوشی کا اظہار کرنے سے پیچھے نہیں رہے، انھوں نے بھی سلمان کے بری ہونے پر مبارک باد دی۔

Image caption شاہ رخ خان ایک بار پھر پہلے مقام پر نظر آ رہے ہیں

شاہ رخ کے خوش ہونے کی ایک اور وجہ بھی ہے اور وہ ہے فوربز میگزین کی تازہ رپورٹ جس کے مطابق شاہ رخ بھارت کی 100 بڑی شخصیات میں واپس اول نمبر پر آ گئے ہیں۔ اس میدان میں انھوں نے سلمان خان کے علاوہ امیتابھ بچن کو بھی پیچھے چھوڑ دیا۔ لگتا ہے کہ انڈسٹری کے کرن ارجن کی اس جوڑی کی قسمت آج کل زوروں پر ہے۔ اداکارہ کرشمہ کپور اور ان کے بزنس مین شوہر سنجے کپور کے درمیان عرصے سے طلاق کا کیس چل رہا تھا جو ان دونوں نے حال ہی میں واپس لینے کا فیصلہ کیا ہے اور خبر ہے کہ دونوں اب اس رشے کو ایک اور موقع دینا چاہتے ہیں۔

تازہ خبر یہ ہے کہ انٹر نیشنل ریالٹی شو ’بگ برادر‘ نے اگلے سیزن کے لیے انھیں شو کا حصہ بننے کی آفر کی ہے۔ اگرچہ ابھی تک کرشمہ اور سنجے نے رسمی طور پر اس شو میں شامل ہونے کے بارے میں کچھ نہیں کہا ہے لیکن اگر وہ اس شو میں شامل ہونے کا فیصلہ کرتے ہیں تو دونوں کی شادی شدہ زندگی کا یہ لائیو ٹیلی کاسٹ کافی دلچسپ رہے گا۔

Image caption کرشمہ کپور کو بگ برادر میں شرکت کی دعوت دی گئی ہے

ویسے شلپا شیٹی ابھی تک واحد بھارتی اداکارہ ہیں جو اس شو کا حصہ رہ چکی ہیں۔

اسی بارے میں