میری بیوی تو انمول ہے: ششی تھرور

آخری وقت اشاعت:  منگل 30 اکتوبر 2012 ,‭ 12:45 GMT 17:45 PST
ششی تھرور

تھرور نے سنندا پشکر سے شادی کر لی تھی

بھارت میں انسانی وسائل کے وزیر مملکت ششی تھرور نے اپنی اہلیہ کے متعلق گجرات کے وزیر اعلٰی نریندر مودی کے بیان کا سخت جواب دیتے ہوئے کہا ہے کہ ’ان کی اہلیہ انمول ہیں۔‘

انہوں نے کہا کہ نریندر مودی پہلے کسی سے محبت کریں تبھی انھیں اس بات کا اندازہ ہو سکےگا۔

گزشتہ روز ہماچل پردیش کے اسمبلی انتخابات کی مہم کے دوران ایک ریلی سے خطاب کرتے ہوئےگجرات کے وزیر اعلٰی نریندر مودی نے کابینہ میں شامل کیےگئے نئے وزیر ششی تھرور پر نکتہ چینی کی تھی۔

مسٹر مودی نے ششی تھرور پر بدعنوانی کا الزام لگاتے ہوئے ان کی اہلیہ سنندا پشکر کو پچاس کروڑ روپے کی گرل فرینڈ بتایا تھا۔

ریلی سے خطاب میں انہوں نے کہا تھا: ’واہ، کیا گرل فرینڈ ہے۔ آپ نے کبھی دیکھی ہے پچاس کروڑ کی گرل فرینڈ؟‘

ششی تھرور نے اس کے جواب میں ٹوئٹر پر لکھا ’میری اہلیہ کی قیمت آپ کے خیالی پچاس کروڑ سے کہیں زیادہ ہے۔ وہ انمول ہیں۔ لیکن یہ سمجھنے کے لیے آپ کو کسی پیار کرنا پڑیگا۔‘

"میری اہلیہ کی قیمت آپ کے خیالی پچاس کروڑ سے کہیں زیادہ ہے۔ وہ انمول ہیں۔ لیکن یہ سمجھنے کے لیے آپ کو کسی پیار کرنا پڑیگا۔"

ششی تھرور پہلے بھی خارجہ امور کے وزیر مملکت تھے لیکن جب ان پر یہ الزام لگایا گیا کہ انہوں نے اپنی گرل فرینڈ کو فائدہ پہنچانے کے لیے اثر و رسوخ کا استعمال کیا ہے تو انھوں نے استعفی دے دیا تھا۔

ان پر الزام تھا کہ سنندا پشکر آئی پی ایل میں کوچی کی ٹیم کی پرموٹر تھیں اور ششی نے انھیں ٹیم کے حصص دلوانے میں اہم کردار ادا کیا تھا۔

بعد میں ششی تھرور نے سنندا پشکر سے شادی کر لی تھی۔ وزیراعظم منموہن سنگھ نے اتوار کو جب کابینہ میں توسیع کی تو انہیں دوبارہ وزیر بنا دیا گیا۔

نریندر مودی نے اس معاملے کو حکومت پر تنقید کے لیے اٹھایا تھا لیکن کانگریس نے بھی اس سے سیاسی فائدہ اٹھانے کی کوشش کی۔

اسی بارے میں

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔