گورو کی موت پر مظاہرے،’چند سو کی شرکت‘

آخری وقت اشاعت:  ہفتہ 9 فروری 2013 ,‭ 14:11 GMT 19:11 PST

افضل گرو کی پھانسی پر اسلام آباد میں بھی احتجاجی مظاہرہ کیا گیا

بھارتی پارلیمان پر حملے کے مبینہ منصوبہ ساز افضل گرو کی پھانسی کے خلاف پاکستان کے زیرِانتظام کشمیر میں سنیچر کو احتجاجی مظاہرے منعقد ہوئے ہیں لیکن ان میں بہت کم تعداد میں مظاہرین نے شرکت کی۔

پاکستان کے زیرِانتظام کشمیر کی حکومت نے افضل گورو کی پھانسی کے خلاف سنیچر سے ہی تین روزہ سوگ کا اعلان کیا ہے۔

پاکستان کے زیر انتظام کشمیر کے وزیراعظم کے مشیر برائے سیاسی امور مرتضیٰ درانی نے بی بی سی کے نامہ نگار کو بتایا کہ سوگ کے دوران ریاست کا پرچم سرنگوں رہے گا۔

انھوں نے کہا کہ کسی کو بھارتی عدالتوں سے انصاف کی توقع نہیں رکھنی چاہیے۔

اسی دوران پاکستان کے زیر انتظام کشمیر کے مختلف علاقوں میں افضل گورو کی پھانسی کے خلاف احتجاجی مظاہرے کیے گئے ہیں۔

مظفرآباد میں کشمیری پناہ گزینوں نے احتجاجی مظاہرہ کیا جس میں چند سو افراد نے شرکت کی۔ عینی شاہدین کا کہنا ہے کہ مشتعل مظاہرین بھارت مخالف اور گورو اور کشمیر کی آزادی کے حق میں نعرے لگا رہے تھے اور انہوں نے بھارتی پرچم بھی نذر آتش کیا۔

عینی شاہدین کا کہنا ہے کہ مظفرآباد کے علاوہ میرپور، راولاکوٹ اور کوٹلی میں بھی احتجاجی مظاہرے کیے گیے لیکن ان میں بھی لوگوں کی بہت کم تعداد نے شرکت کی۔

پاکستان کے دارالحکومت اسلام آباد میں بھی جماعت الدعوۃ کے زیرِ اہتمام احتجاجی مظاہرہ کیا گیا جس میں لگ بھگ ایک سو افراد نے شرکت کی۔ یہ مظاہرین بھی بھارت کے خلاف اور جہاد کے حق میں نعرے لگارہے تھے۔

ادھر شدت پسند گروپ لشکرِ طیبہ نے بھارت کو خبردار کیا ہے کہ وہ افضل گورو کو پھانسی دیے جانے کا بدلہ لے گا۔

لشکرِ طیبہ کے ترجمان ڈاکٹر عبداللہ غزنوي نے بی بی سی کے نامہ نگار کو فون پر بتایا کہ ’افضل کو پھانسی سے چڑھانے سے ہی سب کچھ ختم نہیں ہوا ہے۔ بہت جلد ہی بھارت کو اس اقدام کا نتیجہ بھگتنا ہوگا۔‘

ان کا یہ بھی کہنا تھا کہ ’عدالتی عمل مکمل کیے بغیر اور اتنی جلد بازی میں انہیں پھانسی پر چڑھایا جانا ایک بار پھر ثابت کرتا ہے کہ بھارت میں تمام حکومتیں اقتدار میں رہنے کے لیے مسلمانوں کے جذبات کی قدر نہیں کرتی ہیں۔‘

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔