افغان انتخابات بحران کا شکار: تصاویر

عبد اللہ عبداللہ نے ابتدائی نتائج میں اپنے حریف اشرف غنی کی برتری کو تسلیم نہ کرتے ہوئے اپنی کامیابی کا دعوی کر دیا ہے۔

عبد اللہ عبداللہ نے اپنی کامیابی کا دعوی کابل میں اپنے ہزاروں حامیوں کے ایک اجتماع میں کیا۔

عبداللہ عبداللہ کو ابتدائی نتائج میں پینتالیس فیصد ووٹ حاصل ہوئے ہیں جبکہ ان کے مدمقابل پچاس فیصد سے زیادہ ووٹ حاصل کرنے میں کامیاب ہو گئے ہیں۔

کابل میں اشرف غنی کی کامیابی کی خبروں کے بعد پیر کی رات کو ان کے حامی سڑکوں پر نکل آئے اور انھوں نے فتح کا جشن منانا شروع کردیا۔

ابتدائی نتائج کے سامنے آنے کے بعد افغانستان میں ایک نیا سیاسی بحران پیدا ہوتا ہوا نظر آ رہا ہے اور عبداللہ عبداللہ متاوزی حکومت بنانے کا اعلان کرنے کی خبریں بھی گردش کر رہی ہیں۔

افغانستان میں پیدا ہونے والے سیاسی بحران پر امریکی وزیر خارجہ جان کیری نے بھی تشویش کا اظہار کیا ہے اور اقتدار غصب کرنے کے بارے میں متنبہ کیا ہے۔

عبداللہ عبداللہ کے حامیوں میں عورتوں کی بھی بڑی تعداد شامل تھی اور ان میں زبردست جوش و خروش پایا جاتا تھا۔

عورتیں بھی اپنے رہنما کے حق میں نعرے بازی کر رہی تھیں اور اس موقع پر صدر کرزئی اور افغان الیکش کمیشن کے خلاف بھی نعرے لگائے گئے۔

عبداللہ عبداللہ کو بہت سے جنگجو سرداروں اور کئی صوبوں کے گورنروں کی حمایت بھی حاصل ہے جس سے صورت حال مزید پیچیدہ ہو گئی ہے۔

اس دوران افغانستان میں تشدد کے واقعات بھی جاری ہیں اور مشرقی افغانستان میں ایک خود کش دھماکے میں دو پولیس اہلکاروں سمیت سولہ افراد ہلاک ہوئے۔