ورلڈ چیمپیئن کی برلن آمد

جرمنی فٹبال ورلڈ کپ جیتنے کے بعد وطن واپس پہنچ گئی ہے، جہاں اس کا والہانہ استقبال کیا جا رہا ہے۔

جرمنی نے 24 برس بعد ورلڈ کپ جیتا ہے۔ وہ پچھلے مسلسل چار ورلڈ کپ میں سیمی فائنل میں ہار جاتا تھا۔

جرمنی کی فتح میں ان کے کوچ یوآخیم لوو کا بہت بڑا کردار ہے جو پچھلے آٹھ برسوں سے جرمنی کے کوچ ہیں۔

توماس ملر اور شوائن سٹائیگر نے جرمنی کی جیت میں انتہائی اہم کردار ادا کیا ہے۔

جرمنی کے ہزاروں تماشائی ان راستوں میں کھڑے ہیں جہاں سے فاتح ٹیم گزر رہی ہے۔

پرجوش ہجوم نے ہاتھوں میں بینر اور پلے کارڈ اٹھا رکھے تھے جن پر ٹیم کے لیے تہنیتی پیغام درج تھے۔

فیفا ورلڈ کپ کے فائنل میں جرمنی نے ارجنٹائن کو ایک گول سے شکست دی تھی۔

یہ چوتھا موقع ہے کہ جرمنی کی ٹیم ورلڈ کپ جیتنے میں کامیاب ہوئی ہے، تاہم اس موقعے کے لیے اسے 24 برس انتظار کرنا پڑا۔

جرمنی نے برازیل میں ہونے والے فیفا ورلڈ کپ جیتنے کے جشن میں یادگاری ٹکٹیں شائع کی ہیں۔ مگر یہ ٹکٹیں میچ سے پہلے ہی چھاپ لی گئی تھیں۔

جرمنی کے وزیر خزانہ کا کہنا ہے کہ وہ پرامید تھے کہ جرمنی کی ٹیم ورلڈ کپ جیت جائے گی اور اسی لیے انھوں نے میچ سے قبل ہی 50 لاکھ ٹکٹیں چھپوا لیں۔

گرافک ڈیزائنر لیتز مینزے کا کہنا ہے کہ اس یادگاری ٹکٹ پر کسی ایک کھلاڑی کو نہیں دکھایا گیا اور اس کا مقصد پوری ٹیم کو خراج تحسین پیش کرنا ہے۔

ان کا کہنا تھا کہ عام طور پر ایک ٹکٹ کی تیاری میں چھ ماہ لگتے ہیں لیکن ان سے اس وقت ٹکٹ کے ڈیزائن کرنے کے لیے رجوع کیا گیا جب ورلڈ کپ شروع ہو چکا تھا۔

یاد رہے کہ 2014 فیفا ورلڈ کپ جرمنی کا چوتھا ورلڈ کپ ٹائٹل ہے۔ اس سے قبل وہ 1954، 1974 اور 1990 میں جیتا تھا۔