لاہور کے علاقے ڈیفنس کی کمرشل مارکیٹ میں دھماکہ، نو ہلاک

،ویڈیو کیپشن

’لاہور ڈیفنس میں دھماکہ کے بعد کی ویڈیو‘

پاکستان کے صوبہ پنجاب کے دارالحکومت لاہور میں جمعرات کی صبح ہونے والے دھماکے میں ہلاکتوں کی تعداد نو ہوگئی ہے جبکہ 32 افراد زخمی ہیں۔

یہ دھماکہ شہر کے متمول علاقے ڈیفنس ہاؤسنگ اتھارٹی کی کمرشل مارکیٹ میں واقع ایک ریستوران کی عمارت میں سوا گیارہ بجے کے قریب ہوا۔

بی بی سی کے نامہ نگار عمر دراز کے مطابق پنجاب حکومت کے ترجمان ملک احمد خان نے تصدیق کی ہے نو افراد ہلاک ہوئے ہیں جبکہ چار افراد کی حالت تشویش ناک ہے۔ انھوں نے بتایا کہ 32 افراد زخمی ہیں۔

پنجاب کے وزیرِ قانون رانا ثنا اللہ نے پاکستانی ذرائع ابلاغ سے بات کرتے ہوئے کہا کہ دھماکہ جس عمارت میں ہوا وہاں تعمیراتی کام جاری تھا۔

محکمۂ انسدادِ دہشت گردی کے ایس ایس پی ڈاکٹر اقبال نے جائے وقوع پر موجود صحافیوں کو بتایا ہے کہ جس جگہ دھماکہ ہوا وہاں سے بارودی مواد کے شواہد ملے ہیں تاہم تاحال یہ واضح نہیں کہ یہ مواد وہاں نصب تھا یا یہ کسی اور مقام پر نصب کرنے کی تیاری کے دوران پھٹا۔

اس سے قبل حکومتِ پنجاب کی جانب سے ٹوئٹر پر جاری کیے گئے پیغام میں دھماکے کی وجہ جنریٹر کا پھٹنا بتائی گئی تھی۔

،تصویر کا ذریعہAFP

،تصویر کا کیپشن

دھماکے کا نشانہ بننے والی عمارت کے آس پاس واقعے عمارتوں اور وہاں کھڑی گاڑیوں کو بھی اس واقعے میں نقصان پہنچا

ریسکیو 1122 کے ڈائریکٹر جنرل ڈاکٹر رضوان کا کہنا ہے کہ امدادی آپریشن مکمل کر لیا گیا ہے اور دھماکے کے نتیجے میں عمارت کی ایک منزل کی چھت نیچے آ گری تھی۔

دھماکے کے بعد بم ڈسپوزل سکواڈ اور شعبۂ انسدادِ دہشت گردی کے اہلکار اور افسران بھی جائے وقوعہ پر پہنچ گئے۔

دھماکے کا نشانہ بننے والی عمارت کے آس پاس واقعے عمارتوں اور وہاں کھڑی گاڑیوں کو بھی اس واقعے میں نقصان پہنچا اور ان کے شیشے ٹوٹ گئے۔

،تصویر کا کیپشن

دھماکے کے بعد بم ڈسپوزل سکواڈ اور شعبۂ انسدادِ دہشت گردی کے اہلکار اور افسران بھی جائے وقوعہ پر پہنچ گئے

یہ لاہور میں گذشتہ دس دن کے دوران ہونے والا دوسرا دھماکہ ہے۔

اس سے قبل مال روڈ پر چیئرنگ کراس کے مقام پر ایک خودکش حملے میں اعلیٰ پولیس افسران سمیت افراد ہلاک ہوئے تھے۔

خیال رہے کہ پاکستان میں حالیہ چند ہفتوں کے دوران دہشت گردی کے واقعات میں اچانک اضافے دیکھا گیا ہے جس میں اب تک 100 سے زیادہ افراد مارے جا چکے ہیں۔

ان واقعات کے بعد پاکستانی فوج نے بدھ کو ہی ملک میں شدت پسندوں کے خلاف ’رد الفساد‘ کے نام سے نیا آپریشن شروع کرنے کا اعلان کیا ہے۔