مریم نواز کے خلاف جعلسازی کے تحت کارروائی کی جا سکتی ہے: سپریم کورٹ

  • فراز ہاشمی
  • بی بی سی اردو ڈاٹ کام، لندن
وکی پیڈیا پر 'کیلیبری' کا صفحہ

،تصویر کا ذریعہWikipedia

پاکستان کی سپریم کورٹ کے پانچ رکنی لاجر بینچ نے نواز شریف اور ان کے بچوں کے خلاف اپنے فیصلے میں ’کیلبری فونٹ‘ کا ایک مرتبہ پھر ذکر کرتے ہوئے کہا ہے کہ یہ جعلسازی ہے اور اس کی بنیاد پر مریم نواز کے خلاف جعلسازی اور جعلی دستاویزات پیش کرنے کے الزامات میں کارروائی کی جا سکتی ہے۔

عدالت نے کہا کہ کیلبری فونٹ سنہ 2007 میں دستیاب نہیں تھا اور مریم نواز شریف کی ٹرسٹ ڈیڈ پر سنہ 2006 کی تاریخ درج تھی جس سے یہ نتیجہ اخذ کیا جا سکتا ہے کہ یہ ایک جعلی دستاویز ہے۔

کیلبری فونٹ کا ذکر چند ہفتے قبل دنیا بھر کے بہت سے بڑے بڑے اخبارات میں اس وقت نظر آیا تھا جب جے آئی ٹی نے اپنی رپورٹ سپریم کورٹ کے سامنے پیش کی تھی اور اس رپورٹ کی کاپیاں ذرائع ابلاغ کے نمائندوں کی دسترس میں بھی آ گئی تھیں۔ سوشل میڈیا پر بھی کیلبری فونٹ کا خوب ذکر کیا گیا۔

مشترکہ تحقیقاتی ٹیم کو باہمی قانونی معاونت کے ذریعے فوزیکا فورنسکا کے اینٹی منی لانڈرنگ آفیسر سے حاصل کردہ دستاویزات کے مطابق مریم نواز ہی لندن کے ایونفیلڈ اپارٹمنس کی بینفیشل اونر یا مالک ہیں اور ان کو ان فلیٹس کی ٹرسٹی ظاہر کرنے والے دستاویزات جو شریف خاندان کی طرف سے پیش کیے گئے وہ جعلی ہیں۔

،تصویر کا ذریعہReuters

،تصویر کا کیپشن

پاناما جے آئی ٹی کی رپورٹ میں اگر سب سے زیادہ کچھ موضوعِ بحث رہا تو وہ بلاشبہ کیلیبری فونٹ تھا

مریم نواز کے خلاف نیب میں ریفرنس دائر کرنے کا حکم بھی اس فیصلے میں شامل ہے۔

مریم نواز کے شوہر کپٹن ریٹائرڈ صفدر کو بھی قومی اسمبلی کی رکنیت سے نااہل قرار دے دیا گیا ہے۔

مریم نواز شریف کا نااہل ہونا اور ان کے خلاف جعلسازی اور جعلی دستاویزات کی بنیاد پر مقدمے چلانے کی سپریم کورٹ کی طرف سے بات نواز لیگ کے لیے نواز شریف کی نااہلی کے بعد ایک اور بڑا دھچکا ہے۔ نہ صرف مریم نواز اگلے برس ہونے والے عام انتخابات میں حصہ نہیں لے سکیں گی بلکہ نواز شریف کے چار بچوں میں سے تین بچے بھی اس دوڑ سے باہر ہو گئے ہیں۔

نواز شریف کی ایک صاحبزادی اسحاق ڈار کی بہو ہیں اور وہ کبھی سیاست میں نظر نہیں آئی ہیں۔