لاہور چڑیا گھر میں ایک ہفتے قبل درآمد کی جانے والی مادہ چیتے کی موت

  • حنا سعید
  • بی بی سی اردو ڈاٹ کام، لاہور
چیتے
،تصویر کا کیپشن

چیتوں کے جوڑے کو حال ہی میں جنوبی افریقہ سے درآمد کیا گیا تھا

جنوبی افریقہ سے لاہور کے چڑیا گھر کے لیے درآمد کیے جانے والے چیتوں کے جوڑے میں سے مادہ چیتا ہلاک ہوگئی ہے۔

پاکستان کے صوبہ پنجاب کے دارالحکومت لاہور کے چڑیا گھر کے ڈپٹی ڈائریکٹر تنویر احمد نے بی بی سی کو بتایا کہ 'مرنے والی مادہ چیتے کا پوسٹ مارٹم کرایا جا رہا ہے جس کے بعد اس کی موت کی وجہ سامنے آئے گی۔'

یہ بھی پڑھیے

انھوں نے خیال ظاہر کیا کہ چیتوں کا یہ جوڑا جنوبی افریقہ سے درآمد کیا گیا تھا لہٰذا ماحول اور جگہ کی تبدیلی ہلاکت کی وجہ ہو سکتی ہے۔

،تصویر کا کیپشن

چیتے کے جوڑے کی قیمت 79 لاکھ 50 ہزار روپے ہے

لاہور کے چڑیا گھر کے ڈپٹی ڈائریکٹر تنویر احمد کے مطابق عالمی قوانین کے تحت درآمد کیے جانے والے جانوروں کی ایک ماہ تک دیکھ بھال کی ذمہ داری کانٹریکٹر کی ہوتی ہے۔

انھوں نے بتایا کہ 'مرنے والی مادہ چیتے کی لاش بھی کنٹریکٹر کے حوالے کر دی گئی ہے اور وہ لاہور میں ہی قائم یونیورسٹی آف ویٹنری اینڈ اینیمل سائنسز سے اس کا پوسٹ مارٹم کرائیں گے جس کی رپورٹ پیر کے روز مل جائے گی۔'

30 اکتوبر کو چیتے کے جوڑے ساتھ ہی سفید جوڑے شیروں کا جوڑا بھی درآمد کیا گیا تھا۔ دونوں جوڑوں کی درآمد پر ایک کروڑ 80 لاکھ روپے لاگت آئی تھی۔

،تصویر کا کیپشن

ماحول اور جگہ کی تبدیلی کو مادہ چیتے کی موت کی وجہ تصور کیا جا رہا ہے

چیتے کا جوڑا 79 لاکھ 50 ہزار روپے میں جبکہ سفید شیروں کا جوڑا 99 لاکھ 90 ہزار روپے میں چڑیا گھر کے فنڈز سے خریدا گیا تھا۔

ڈائریکٹر جنرل وائلڈ لائف اینڈ پارکس پنجاب خالد عیاض خان نے بی بی سی کو بتایا تھا کہ درآمد کے وقت نر چیتے کی عمر چار سال دو دن اور مادہ چیتے کی عمر تین سال دو ماہ اور 25 دن تھی جبکہ نر سفید شیر کی عمر چار سال اور مادہ سفید شیر کی عمر تین سال 2 دن تھی۔