کراچی والے گرمی سے بے حال

گرمی

،تصویر کا ذریعہReuters

پاکستان کے سب سے بڑے شہر کراچی میں شدید گرمی کی لہر جاری ہے اور منگل کو درجہ حرارت 44 ڈگری سینٹی گریڈ تک جا پہنچا ہے۔

پاکستان کے محکمہ موسمیات کے مطابق گرمی کی یہ شدت آئندہ ہفتے بھی برقرار رہے گی اور دن کے وقت درجہ حرارت 40 سے 43 ڈگری سینٹی گریڈ کے درمیان رہنے کا امکان ہے۔

،تصویر کا ذریعہEPA

محکمہ موسمیات اور طبی ماہرین نے گرم موسم میں ماہ رمضان کے پیش نظر شہریوں کو احتیاطی تدابیر اختیار کرنے کی ہدایات بھی جاری کی ہیں۔

کراچی میں ہیٹ سٹروک سے ہلاکتوں کے بارے میں متضاد اطلاعات ہیں۔

ایدھی حکام کا کہنا ہے کہ گذشتہ تین دنوں میں ان کے مراکز لائے جانے والی لاشوں کی تعداد عام دنوں کی نسبت کہیں زیادہ ہےتاہم شہر کے سرکاری ہسپتالوں نے ہیٹ سٹروک سے کسی شخص کی ہلاکت کی تصدیق نہیں کی ہے۔

،تصویر کا ذریعہReuters

خبررساں ادارے اے ایف پی کے مطابق کراچی کے میئر وسیم اختر نے شہریوں کو دن کے وقت ہیٹ سٹروک سے بچاؤ کے لیے سایہ دار جگہوں پر رہنے کی ہدایت کی ہے۔

،تصویر کا ذریعہReuters

اس کے علاوہ ہزاروں کی تعداد ملازمت اور دیگر امور کے سلسلے پر گھروں سے باہر رہتے ہیں اور عوامی مقامات اور گلیوں میں پانی سے خود کو تسکین پہنچاتے دکھائی دیتے ہیں۔

،تصویر کا ذریعہReuters

خیال رہے کہ تقریبا ڈیڑھ کروڑ آبادی والی شہر میں بجلی کی لوڈ شیڈنگ نے شہریوں کے مسائل میں مزید اضافہ کر دیا ہے جبکہ ماہرین کے مطابق درختوں کی کٹائی سے بھی درجہ حرارت میں اضافہ ہوا ہے۔

،تصویر کا ذریعہAFP

دوسری جانب بے گھر افراد اور محنت مزدوری کرنے والا طبقہ گرم موسم سے سب سے زیادہ متاثر ہوا ہے جنھیں سایہ دار جگہیں اور پینے کی صاف پانی کی سہولت کے فقدان کا سامنا بھی ہے۔

خیال رہے کہ جون 2015 میں کراچی سمیت سندھ کے جنوبی علاقوں میں آنے والے گرم موسم کی لہر سے تقریباً 1200 افراد کی ہلاکت ہوئی تھی۔

،تصویر کا ذریعہReuters