گذشتہ ہفتے کا پاکستان تصاویر میں

سنیچر کو واہگہ سرحد پر انڈیا نے یوم جمہوریہ کا جشن منایا اور رنگارنگ پروگرام منعقد ہوئے۔ خواتین نے روایتی پنجابی رقص بھی پیش کیا۔

دوسری جانب لاہور میں انڈیا کے یوم جمہوریہ کے موقعے پر کشمیریوں کے ساتھ اظہار یکجہتی اور انڈیا کے خلاف مظاہرہ کیا گیا۔

واہگہ سرحد پر پاکستانی کسٹم اہلکاروں نے شراب کی بوتلیں بلڈوزر سے کچلنے کے عمل کی نگرانی کی۔ ایسا 26 جنوری کو بین الاقوامی کسٹمز ڈے کے موقع پر کیا گیا۔

یہ منظر حیدرآباد کا ہے جہاں 26 جنوری کو ہی بین الاقوامی کسٹمز ڈے کے موقعے پر پکڑی جانے والی غیر قانونی تمباکو کی بوریوں کو نذرِ آتش کیا گيا۔

پنجگور میں ہونے والے بس حادثے میں ہلاک ہونے والوں کی نماز جنازہ ادا کی جا رہی ہے۔ 21 جنوری کو ہونے والے اس بس حادثے میں تقریباً 24 افراد ہلاک ہوئے تھے۔

لاہور میں ایک حجام کو ایک شخص کی مونچھیں تراشتے دیکھا جا سکتا ہے لیکن فوٹوگرافر نے درحقیقت اس تصویر کے ذریعے فضائی آلودگی کے مسئلے کو اجاگر کیا ہے۔

کراچی میں لوگ ٹھنڈ سے بچنے کے لیے روایتی طور پر آگ جلا کر سردی سے بچنے کی کوشش کر رہے ہیں۔

پاکستان کے وزیر اعظم عمران خان کو قطری چیمبر کے سربراہ شیخ خلیفہ بن جسیم الثانی کے ساتھ دیکھا جا سکتا ہے۔ عمران خان کو حال ہی میں ہونے والے ایک سروے میں 51 فیصد مقبولیت کی ریٹنگ ملی ہے۔

لاہور میں ایک خوانچہ فروش لڈو پیٹھی تیار کر رہا ہے۔

جنوبی افریقہ کے دورے پر سینچورین میں پاکستانی اوپنر امام الحق نے سنچری ضرور بنائی لیکن پاکستان کی ٹیم ڈک ورتھ لوئس کے اصول کے تحت یہ میچ ہار گئی اور جنوبی افریقہ کو سیریز میں ایک کے مقابلے دو میچوں کی سبقت حاصل ہو گئی ہے۔

کراچی کے ساحلِ سمندر پر شام ڈھلنے کا منظر۔ ساحل پر آنے والے سیاح اکثر اونٹ کی سواری کرتے ہیں۔