بڑی توند والے اہلکار تھانے تک محدود

آخری وقت اشاعت:  منگل 4 ستمبر 2012 ,‭ 16:49 GMT 21:49 PST

پنجاب پولیس کے تقریباً ایک لاکھ پچھتر ہزار اہلکار صوبے میں اپنی ذمہ داری سر انجام دے رہے ہیں

پاکستان کے صوبہ پنجاب میں پولیس کے سربراہ حبیب الرحمان نے بڑی توند والے پولیس افسروں اور اہلکاروں کو کمر کم نہ کرنے کی پاداش میں آپریشنل ڈیوٹی سے ہٹانے کا حکم دیا ہے۔

یہ فیصلہ پنجاب میں امن وامان کے حوالے سے ہونے والے ایک اجلاس میں کیا گیا جس کی صدارت آئی جی یعنی انسپیکٹر جنرل آف پولیس نے کی۔

آئی جی پولیس پنجاب حبیب الرحمان نے ہدایت کی کہ بڑی توند والے پولیس اہلکاروں سے آپریشنل ڈیوٹی واپس لے لی جائے ان اہلکاروں کی جگہ چاق و چوبند اہلکاروں تعینات کیا جائے۔

نامہ نگار عباد الحق کے مطابق آئی جی پنجاب نے جون میں صوبے کے تمام پولیس افسروں اور اہلکاروں کو ایک ماہ کی مہلت دیتے ہوئے حکم دیا تھا کہ وہ اپنی توند کم کریں۔

آئی جی کے احکامات کے بعد صوبے بھر میں متعدد پولیس افسروں اور اہلکاروں نے پارکوں اور جِم کا رخ کیا تھا۔

ایک ماہ کی مدت پوری ہونے پہلے ہی انسپیکٹر جنرل حبیب الرحمان نے پولیس افسروں اور اہلکاروں کو توند کم کرنے کے لیے مزید مہلت دی اور بعد میں رمضان شروع ہونے کے باعث تمام اہلکاروں کو غیر معینہ مدت کے لیے چھوٹ دی گئی تھی۔

رمضان اور عید کے بعد انسپیکٹر جنرل پولیس پنجاب حبیب الرحمان نے دوبارہ پولیس افسروں اور اہلکاروں کی بڑی توند کا نوٹس لیا۔

آئی جی پولیس پنجاب کے احکامات کے تحت پولیس عملے کی کمر اڑتیس انچ سے زیادہ نہیں ہونی چاہیے۔

آئی جی حبیب الرحمان نے ہدایت کی کہ جن پولیس افسروں اور اہلکاروں کی کمر اڑتیس انچ سے کم ہو انہیں دوبارہ آپریشنل ڈیوٹی دے دی جائے۔

پنجاب پولیس میں تقریباً ایک لاکھ پچھتر ہزار اہلکار ہیں جو صوبے بھر میں اپنی ذمہ داری سر انجام دے رہے ہیں۔

پنجاب کے آئی جی کے نئے احکامات کے بعد اب پولیس افسروں اور اہلکاروں کو پھر سے پارکوں اور جم کا رخ کرنے پڑے گا تاکہ وہ اپنی بڑی توند کو کم کرکے دوبارہ آپریشنل ڈیوٹی پر آسکیں۔

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔