چنیوٹ: ٹریفک حادثے میں سترہ افراد ہلاک

Image caption پولیس اہلکار نے بتایا کہ اس واقعے میں پانچ خواتین اور دو بچے بھی ہلاک ہوئے ہیں

پاکستان کے صوبہ پنجاب میں ضلع چنیوٹ کے قریب مسافر کوچ اور ٹرک کے درمیان تصادم کے نتیجے میں سترہ افراد ہلاک ہوگئے ہیں۔

ضلع چنیوٹ کے صدر تھانہ کے ایس ایچ او محمد انور نے بی بی سی کو بتایا کہ حادثہ چنیوٹ اور پنڈی بھٹیاں کے درمیان ایک بستی میں ہوا۔

پولیس اہلکار نے بتایا کہ اس واقعے میں پانچ خواتین اور دو بچے بھی ہلاک ہوئے ہیں۔ مقامی ذرائع ابلاغ کے مطابق یہ واقعہ پیر کو رات دیر سے پیش آیا۔

انھوں نے کہا کہ ہائی روف مسافر کوچ راولپنڈی کی طرف سے آ رہی تھی جبکہ ٹرک چنیوٹ کی طرف سے آ رہا تھا کہ ان کے درمیان تصادم ہوا۔

ایس ایچ او نے حادثے کی تفصیلات بتاتے ہوئے کہا کہ مسافر کوچ بے قابو ہوئی اور ٹرک سے جا ٹکرائی جس کے بعد مسافر کوچ میں آگ لگ گئی۔

ان کا کہنا تھا کہ آگ گیس سلنڈر پھٹنے کی وجہ سے نہیں لگی تھی۔

حادثے کے بعد امدادی کارکنوں نے لاشوں کو نکال کر ہسپتال متنقل کر دیا ہے۔

مئی میں صوبہ پنجاب میں ضلع گجرات میں ایک سکول ویگن میں آگ لگنے سے بچوں سمیت 17 افراد ہلاک جبکہ سات بچے شدید زخمی ہوئے تھے۔

اسی طرح گذشتہ سال نومبر میں صوبہ خیبر پختون خوا کے ضلع کرک میں انڈس ہائی وے پر مسافر کوچ اور ٹرالر کے درمیان تصادم کے نتیجے میں سولہ افراد ہلاک اور تیس زخمی ہوگئے تھے جبکہ صوبہ سندھ کے شہر دادو کے قریب حادثے میں آٹھ افراد ہلاک اور چھ زخمی ہوئے تھے۔

اسی بارے میں