مستونگ:فائرنگ کےتبادلےمیں چھ اہلکار ہلاک

تصویر کے کاپی رائٹ Getty
Image caption بلوچستان میں اس سے پہلے بھی پولیس اہلکاروں کو نشانہ بنایا جاتا رہا ہے

صوبہ بلوچستان کےعلاقے مستونگ میں فائرنگ کے تبادلے میں قانون نافذ کرنے والے اداروں کے چھ اہلکارروں سمیت سات افراد ہلاک ہوگئے۔

فائرنگ کے تبادلے میں اسسٹنٹ کمشنر سمیت سات افراد زخمی ہوئے ہیں۔

مستونگ پولیس کے ایک سینیئر اہلکار نے فون پر بی بی سی کو بتایا کہ چار مسلح افراد نے مستونگ میں ایک سرکاری بینک میں ڈاکہ ڈالنے کی کوشش کی۔

بینک کی حفاظت پر مامور پولیس اہلکاروں کی مزاحمت پر مسلح افراد نے فائرنگ کی جس کے باعث ایک پولیس اہلکار ہلاک جبکہ دوسرا زخمی ہو گیا۔

جب مسلح افراد گاڑی میں فرار ہوئے تو پولیس نے ان کا پیچھا کیا۔

پولیس نے جب مستونگ شہر سے کچھ فاصلے پر واقع گاؤں کے قریب جب مسلح افراد کو روکا تو ان کے مابین فائرنگ کا تبادلہ ہوا۔ مسلح افراد نے گاڑی چھوڑ کر فرار ہونے کی کوشش کی۔

پولیس نے ایک مسلح شخص کوگرفتار کر لیا جبکہ تین قریبی گاؤں میں روپوش ہوگئے۔ پولیس نے مسلح افراد کے زیرِ استعمال گاڑی کو بھی اپنی تحویل میں لے لیا ہے۔

پولیس اور لیویز نے جب گاؤں میں مسلح افراد کا تعاقب کیا تو ان پر فائرنگ ہوئی جس سے پانچ سکیورٹی اہلکار ہلاک ہوگئے۔

فائرنگ کے تبادلے میں اسسٹنٹ کمشنر مستونگ اور پولیس کے ڈی ایس پی سمیت چھ اہلکار زخمی بھی ہوئے۔

پولیس کے مطابق فائرنگ میں ایک اور مسلح شخص ہلاک ہوگیا جبکہ دو ایک موٹر سائیکل پر سوار ہو کر فرار ہونے میں کامیاب ہوگئے۔

اسی بارے میں