جسٹس انور ظہیر جمالی نے عبوری الیکشن کمشنر کا حلف اٹھا لیا

تصویر کے کاپی رائٹ PID
Image caption چیف جسٹس آف پاکستان تصدق حسین جیلانی نے جسٹس انور ظہیر جمالی سے حلف لیا

پاکستان کے سرکاری میڈیا کے مطابق جسٹس انور ظہیر جمالی نے ملک کے عبوری الیکشن کمشنر کے عہدے کا حلف اٹھا لیا ہے۔

اسلام آباد میں ان کی حلف برداری کی تقریب میں عدالتِ عظمیٰ کے جج اور سپریم کورٹ بار کے وکلا نے شرکت کی۔ چیف جسٹس آف پاکستان تصدق حسین جیلانی نے ان سے حلف لیا۔

یاد رہے کہ ایک روز قبل جسٹس ناصر الملک نے الیکشن کمیشنر کا عہدہ اس وقت چھوڑ دیا تھا جب ان کو ملک کا آئندہ چیف جسٹس نامزد کر دیا گیا تھا۔

پاکستان کے موجودہ چیف جسٹس تصدق حسین جیلانی پانچ جولائی کو اپنے عہدے سے سبکدوش ہو جائیں گے جبکہ جسٹس ناصر الملک چھ جولائی کو اپنے عہدے کا حلف اُٹھائیں گے۔

تصدق حسین جیلانی کی ریٹائرمنٹ سے متعلق فل کورٹ ریفرنس چار جولائی کو ہوگا۔ سپریم کورٹ کے شعبۂ تعلقات عامہ نے بھی اس نوٹیفکیشن کی تصدیق کی ہے۔

جسٹس ناصر الملک کے عہدہ سنبھالنے کے بعد جسٹس جواد ایس خواجہ سپریم کورٹ کے ججوں کی سینیارٹی میں چیف جسٹس کے بعد دوسرے نمبر پر ہوں گے اور یہ توقع کی جا رہی تھی کہ جسٹس جواد ایس خواجہ مستقل چیف الیکشن کمشنر کی تعیناتی تک قائم مقام چیف الیکشن کمشنر کی ذمہ داریاں نبھائیں۔ تاہم ذرائع ابلاغ میں آنے والی اطلاعات کے مطابق انھوں نے یہ عہدہ سنبھالنے سے انکار کر دیا تھا۔

اسی بارے میں