’شوال آپریشن کی ’کامیاب تکمیل‘

تصویر کے کاپی رائٹ ISPR
Image caption دورے کے موقع پر آرمی چیف کو اب تک حاصل ہونے والی کامیابیوں سے آگاہ کیا گیا

پاکستانی فوج کے سربراہ جنرل راحیل شریف نے شمالی وزیرستان کے علاقے شوال میں جاری فوجی آپریشن کی کامیاب تکمیل کا اعلان کرتے ہوئے کہا ہے کہ دہشت گردوں سے 800 کلومیٹر کا علاقہ چھڑوا لیا گیا ہے۔

٭شمالی وزیرستان کے مزید علاقے خالی

فوج کے محکمہ تعلقاتِ عامہ کے مطابق پیر کوشوال میں جاری آپریشن کے آخری مرحلے میں اب تک ہونے والی پیش رفت کا جائزہ لینے کے لیے آرمی چیف نے پورا دن وہیں گزارا جہاں فوجی دستے دہشت گردوں کے آخری ٹھکانوں کو ختم کرنے میں مصروف ہیں۔

آپریشن کا آخری مرحلہ پاک افغان سرحد کے قریب جاری ہے۔

دورے کے موقع پر آرمی چیف کو اب تک حاصل ہونے والی کامیابیوں سے آگاہ کیا گیا۔

انھیں بتایا گیا کہ فروری 2016 میں شروع ہونے والے آپریشن میں اب تک 800 مربع کلومیٹر کا علاقہ بازیاب کروایا گیا ہے اور اس دوران دہشت گردوں کو بھاری جانی نقصان ہوا۔

اس موقع پر پاکستانی فوج کے سربراہ نے شوال آپریشن کی کامیاب تکمیل کی تعریف کی اور غیر معمولی کامیابیوں کے حصول اور فوجیوں کی قربانیوں کا اعتراف کیا۔

تاہم انھوں نے بے گھر افراد کی دوبارہ آبادکاری کے لیے تمام ممکنہ وسائل اور صلاحتیوں کو بروے کار لانے کی ضرورت پر زور دیا۔

آرمی چیف نے مزید کہا کہ فاٹا کے علاوہ دیگر علاقوں میں دہشت گردوں کے ٹھکانوں اور ان کے سہولت کاروں کے خلاف بڑے پیمانے پر فوری کارروائیاں کی جائیں اور قانون نافذ کرنے والے اداروں کی رسائی میں اضافہ کیا جائے۔

اسی بارے میں