شدت پسندی کا خطرہ،’مال روڈ پر جلسے کی اجازت نہیں ملی‘

تصویر کے کاپی رائٹ Getty
Image caption مال روڈ پر جلسہ کی اجازت کے لیے تحریک انصاف نے لاہور کی ضلعی انتظامیہ کو درخواست دے رکھی ہے

پاکستان کے شہر لاہور کی ضلعی انتظامیہ نے شہر میں شدت پسندی کے عمومی اور پاکستان تحریک انصاف کے سربراہ عمران خان کو درپیش خطرات کے پیش نظر تحریک انصاف کو یکم مئی کو لاہور کے مال روڈ پر جلسہ کی اجازت دینے سے انکار کردیا۔

انتظامیہ نے جلسے کے انعقاد کے لیے متبادل جگہیں تجویز کی ہیں تاہم تحریک انصاف مال روڈ پر ہی جلسہ کرنے پر بضد ہے۔

پاکستان تحریک انصاف نے پاناما لیکس میں وزیراعظم نوازشریف کے بیٹوں کے نام آف شور کمپنیوں کے ذکر پر ان کے خلاف تحریک چلا رہی ہے۔

تحریک انصاف کے راہنماء عمران خان نے وزیراعظم نوازشریف پر دباؤ بڑھانے کے لیے رائے ونڈ میں ان کے گھر کے گھیراؤ کی دھمکی بھی دی تھی تاہم اس سے پہلے انھوں نے اتوار یکم مئی کو لاہور کے مال روڈ پر پنجاب اسمبلی کے سامنے احتجاجی جلسہ کرنے کا اعلان کیا ہے۔

مال روڈ پر جلسہ کی اجازت کے لیے تحریک انصاف نے لاہور کی ضلعی انتظامیہ کو درخواست دے رکھی ہے تاہم ضلعی حکومت تاحال اس کی اجازت دینے سے گریزاں ہے، اس سلسلے میں رکن پنجاب اسمبلی میاں اسلم اقبال کی قیادت میں تحریک انصاف کے ایک وفد نے جمعرات اور جمعہ کی درمیانی شب ضلعی انتظامیہ سے طویل مذاکرات کیے لیکن دونوں اپنی اپنی بات پر قائم رہے اور مذاکرات بے نتیجہ ختم ہوگئے۔

تصویر کے کاپی رائٹ Getty
Image caption انتظامیہ نے لاہور میں جلسے کے لیے متبادل مقامات کی پیشکش کی ہے

مذاکرات کے بعد لاہور کے ڈی سی او کی جانب سے جلسہ کے چیف آرگنائزر عبدالعلیم خان کے نام لکھے گئے خط میں ان سے کہا گیا ہے کہ تحریک انصاف کے نمائندوں کو لاہور شہر میں شدت پسندی کے خدشے اور خاص طور پر تحریک انصاف کے سربراہ عمران خان کو درپیش خطرے سے آگاہ کیا گیا۔

تحریک انصاف کے قائدین کو یہ بھی بتایا گیا ہے کہ لاہور ہائی کورٹ نے مال روڈ پر جلسے جلوس منعقد کرنے پر پابندی عائد کر رکھی ہے، اس لیے وہ جلسے کے لیے کسی متبادل بند جگہ کا انتخاب کریں جہاں انھیں بھرپور سکیورٹی فراہم کی جا سکے لیکن تحریک انصاف کے نمائندے اس سلسلے میں کوئی فیصلہ نہیں کر سکے۔

معلوم ہوا ہے کہ ضلعی انتظامیہ نے تحریک انصاف کو مال روڈ کے بجائے پنجاب فٹ بال گراؤنڈ، ناصر باغ یا سمن آباد ڈونگی گراؤنڈ میں جلسہ منعقد کرنے کی تجاویز دی ہیں لیکن تحریک انصاف کے قائدین مال روڈ پر ہی جلسہ کرنے کے فیصلے پر قائم ہیں۔

خیال رہے کہ مال روڈ پر جس جگہ تحریک انصاف جلسہ کرنا چاہتی ہے وہاں گذشتہ اتوار کو جماعت اسلامی ’عوامی دھرنا‘ کے نام سے اپنا احتجاجی جلسہ منعقد کر چکی ہے۔

اسی بارے میں