ٹل میں کومبنگ آپریشن جاری،’چھ سہولت کار گرفتار‘

تصویر کے کاپی رائٹ AFP

پاکستان کی فوج کے شعبۂ تعلقات عامہ آئی ایس پی آر کا کہنا ہے کہ صوبہ خیبر پختونخوا کے ضلع ہنگو سے شدت پسندوں کے چھ سہولت کاروں کو گرفتار کر لیا گیا ہے۔

نامہ نگار عزیز اللہ خان کے مطابق آئی ایس پی آر کی جانب سے پیر کو جاری ہونے والے بیان میں کہا گیا ہے کہ یہ گرفتاریاں ہنگو کی تحصیل ٹل میں جاری ’کومبنگ آپریشن‘ کے دوران عمل میں آئی ہیں۔

بیان میں یہ بھی بتایا گیا ہے کہ گرفتار کیے گئے افراد کے قبضے سے اسلحہ اور گولہ بارود بھی برآمد ہوا ہے۔

خیال رہے کہ اتوار کو بھی فوج نے ٹل میں کارروائی کے دوران ایک مبینہ شدت پسند کو گرفتار کرنے کا دعویٰ کیا تھا۔

ادھر قبائلی علاقے خیبر ایجنسی میں بھی شدت پسندوں کے خلاف فوج کا آپریشن جاری ہے اور اتوار کو مختلف کارروائیوں کے دوران چھ شدت پسند ہلاک کرنے کا دعویٰ کیا گیا ہے۔

اتوار کو آئی ایس پی آر کی جانب سے جاری کیے گئے بیان کے مطابق خیبر ایجنسی کے علاقوں ستار قلعے، نارے ناؤ اور راجگال میں فضائی کارروائیوں اور زمینی آپریشن کے دوران دہشت گردوں کے دو ٹھکانے تباہ کیے گئے جبکہ اس دوران چھ شدت پسندوں کو بھی ہلاک کیا گیا۔

اسی بارے میں