انڈیا میں ٹرین حادثے کے بعد امدادی کارروائیاں

انڈیا کی ریاست اتر پردیش کے ضلع کانپور کے قریب ہونے والے مسافر ٹرین حادثے میں ہلاکتوں کی تعداد 128 ہو گئی ہے جبکہ امدادی کارروائیاں پیر کو بھی جاری ہیں

اتوار کو کانپور شہر کے قریب پوکھرایاں کے علاقے میں مقامی وقت کے مطابق صبح ساڑھے تین بجے مسافر ٹرین 'اندور پٹنہ ایکسپریس' کی 14 بوگیاں پٹری سے اتر گئیں

امدادی کارروائیوں میں فوج کے علاوہ ریلوے اور دیگر ادارے حصہ لے رہے ہیں اور یہ کارروائیاں اتوار اور پیر کی درمیانی شب بھی جاری رہیں

پی ٹی آئی کے مطابق وزیر مملکت برائے ریلوے کا کہنا ہے کہ ریلوے بورڈ ممبران حادثے کی وجوہات جاننے کے لیے تحقیقات کر رہے ہیں

حادثے کا شکار ہونے والی ٹرین کے ایک مسافر نے بی بی سی کو بتایا کہ 'رات کے تین بجے کے قریب ہمیں زوردار جھٹکا لگا۔ کئی بوگیاں پٹری سے اتر گئیں۔ ہر ایک صدمے میں تھا، میں نے خود کئی لاشیں اور زخمی دیکھے۔‘

ریلوے کے ترجمان انیل سکسینا نے بتایا کہ کانپور سے گزرنے والی دوسری ٹرینوں کا رخ موڑ دیا گیا ہے

انڈیا میں ریلوے کا نظام پرانا ہونے کے سبب ٹرین کے حادثے معمول کی بات ہیں۔ ایک اندازے کے مطابق انڈیا میں ایک دن میں دو کروڑ 30 لاکھ افراد ٹرین کے ذریعے سفر کرتے ہیں