انڈیا: ہوٹل کا مہمان ’چار ماہ میں 120 ٹی وی لے اڑا‘

پولیس تصویر کے کاپی رائٹ BANGALORE POLICE
Image caption واسو دیو ننایہ گرفتاری کے بعد ان ٹی وی سیٹس کے ساتھ جنھیں چوری کرنے کا ان پر الزام ہے

انڈیا میں ایک شخص کو مبینہ طور پر مختلف ہوٹلوں سے چار ماہ کے دوران 120 سے زیادہ ٹی وی چوری کرنے کے الزام میں گرفتار کر لیا گیا ہے۔

ایک سینئیر پولیس اہلکار نے بی بی سی ہندی کے عمران قریشی کو بتایا کہ ہوٹلوں کے عملے کو واسو دیو ننایہ نامی شخص پر کبھی شبہ اس لیے نہیں ہوا کیونکہ وہ ان کا ’مہذب اور اچھا برتاؤ‘ کرنے والا مہمان تھا۔

پولیس کا کہنا ہے کہ واسو دیو ننایہ ’ایک بڑے سوٹ کیس‘ کے ساتھ چیک اِن کرتے تھے۔

یہ بھی پڑھیے

انڈیا میں چوروں نے سرنگ کھود کر بینک لوٹ لیا

واسو دیو ننایہ کو اکتوبر میں ایک ہوٹل سے ایک ٹیلیویژن چراتے ہوئے پکڑا گیا تھا اور جب انھیں دوبارہ گرفتار کیا گیا تو وہ ضمانت پر تھے۔

پولیس نے الزام عائد کیا ہے کہ واسو دیو ننایہ نے جیل سے رہا ہونے کے چند دنوں کے اندر دوبارہ چوری شروع کر دی۔

ڈپٹی کمشنر چیتن سنگھ راٹھور کا کہنا ہے کہ اگر واسو دیو ننایہ کے سوٹ کیس کا سائز بہت چھوٹا ہوتا تو ’وہ کمرے میں موجود ٹی وی کے سائز کا دوبارہ جائزہ لے کر نیا سوٹ کیس لے لیتے تھے‘۔

ان کا مزید کہنا تھا ’وہ ہوٹل سے کئی بار اندر اور باہر جاتے تاکہ استقبالیے کو معلوم نہ ہو کہ وہ کب ٹی وی سیٹ کے ساتھ باہر گئے ہیں‘۔

واسو دیو ننایہ کو اس وقت گرفتار کیا گیا جب اس شخص نے پولیس کو اطلاع دی جسے وہ مبینہ طور پر ٹی وی بیچنے کی کوشش کر رہے تھے۔

بنگلور پولیس نے واسو دیو ننایہ کے خلاف چوری کے 21 مقدمات درج کیے ہیں اور انھیں امید ہے کہ انھیں ایک لمبے عرصے کے لیے جیل کی سزا ہو گی۔

متعلقہ عنوانات

اسی بارے میں