تصاویر: انڈیا میں دنیا کے سب سے طویل القامت مجسمے کی تعمیر

یہ مجسمہ انڈیا کی تحریک آزادی کے رہنما سردار پٹیل کو خراج عقیدت پیش کرنے کے لیے تعمیر کیا جا رہا ہے
،تصویر کا کیپشن

یہ مجسمہ انڈیا کی تحریک آزادی کے رہنما سردار پٹیل کو خراج عقیدت پیش کرنے کے لیے تعمیر کیا جا رہا ہے

انڈیا میں دنیا کا سب سے طویل القامت مجسمہ تعمیر کے آخری مراحل میں ہے۔

ریاست گجرات میں انڈیا کی جدوجہد آزادی کے ہیرو سردار ولبھ بھائی پٹیل کو خراج عقیدت پیش کرنے کے لیے ان کا تقریباً 182 میٹر (600 فٹ) اونچا مجسمہ تعمیر کیا جا رہا ہے۔

اس وقت دنیا کا سب سے بڑا مجسمہ چین میں سپرنگ ٹمپل بدھا کا ہے جس کی اونچائی 138 میٹر ہے۔

اس منصوبے پر تقریباً 29.9 ارب انڈین روپے لاگت آئی ہے اور اس کو وزیراعظم نریندر مودی کی ذاتی دلچسپی پر مشتمل منصوبے کے طور پر دیکھا جا رہا ہے۔ اسے 'اتحاد کا مجسمہ' کہا جا رہا ہے اور اس کی انڈین وزیراعظم 31 اکتوبر کو نقاب کشائی کریں گے۔

،تصویر کا کیپشن

کئی ہندو قوم پرست رہنما سردار پٹیل کا بہت زیادہ احترام کرتے ہیں

انڈیا کی سنہ 1947 میں آزادی کے بعد ولبھ بھائی پٹیل ملک کے پہلے ڈپٹی وزیراعظم بنے تھے۔

آزادی کے بعد شورش زدہ ریاستوں کو متحد اور انڈیا میں ضم کرنے کی وجہ سے انھیں 'آئرن مین آف انڈیا' کے نام سے یاد کیا جاتا ہے۔

،تصویر کا کیپشن

سردار پٹیل کے سیاسی کردار کو ہندو قوم پرست رہنماؤں نے انتخابی مہم کا حصہ بھی بنایا تھا

بہت سے ہندو قوم پرستوں کا خیال ہے کہ تاریخ میں ان کے مقام کو نہرو خاندان کے مقابلے میں زیادہ اہمیت نہیں دی گئی۔ خیال رہے کہ نہرو خاندان انڈین سیاست کا اہم حصہ ہے۔

یہ بھی پڑھیں!

سنہ 2013 میں اپنی انتخابی مہم کے دوران نریندر مودی کا کہنا تھا کہ 'ہر انڈین کو افسوس ہے کہ سردار پٹیل پہلے وزیراعظم نہیں بنے۔'

اس مجسمے کی تعمیر سنہ 2013 میں شروع ہوئی تھی اور مکمل ہونے کے بعد کانسی سے مزین یہ مجسمہ نیویارک کے سٹیچیو آف لبرٹی سے لمبائی میں دگنا ہوگا۔

یہ امید کی جا رہی ہے کہ یہ جگہ اہم سیاحتی مقام بن جائے گی۔

،تصویر کا کیپشن

یہ مجسمہ ریاست گجرات کے دور دراز مقام پر تعمیر کیا جا رہا ہے

اس مجسمے کو بلندی سے دیکھنے کے لیے اس کے قریب ایک گیلری بھی تعمیر کی جارہی ہے جس کی اونچائی 153 میٹر ہوگی۔

،تصویر کا کیپشن

مجسمے کو دیکھنے کے لیے ایک الگ سے مینار بھی تعمیر کیا جا رہا ہے

یہ مجسمہ ریاستی دارالحکومت احمد آباد سے 200 کلومیٹر فاصلے پر واقع ہے۔

،تصویر کا کیپشن

اس مجسمے کی تعمیر میں ہزاروں مزدور حصہ لے رہے ہیں

اس مجسمے کی تعمیر کے لیے 2500 سے زائد افراد کام کر رہے ہیں جن میں کئی سو چینی مزدور بھی شامل ہیں۔

،تصویر کا کیپشن

کئی ہندو قوم پرست رہنما سردار پٹیل کا بہت زیادہ احترام کرتے ہیں

۔