کشمیر: مسلح حملے میں چار ہلاک

تصویر کے کاپی رائٹ AFP
Image caption پلوامہ ضلع جنوبی کشمیر کے پارلیمان حلقے کا حصہ ہے اور یہاں 24 اپریل کو ووٹ ڈالے جائیں گے

بھارت کے زیرِانتظام جنوبی کشمیر کے پلوامہ ضلع میں مسلح شدت پسندوں کے حملے میں دو پولیس اہل کار ہلاک ہوگئے۔ جوابی کارروائی میں دو شدت پسند بھی مارے گئے۔

یہ حملہ پلوامہ کے کھری وا گاؤں میں واقع ہند نواز گروپ نیشنل کانفرنس کے ایک رہنما کے گھر پر ہوا۔

یاور مسعودی نامی اس کارکن کے گھر میں پیر کو منعقد ہونے والی سیاسی ریلی کی تیاری ہو رہی تھی۔

جنوبی کشمیر کے اعلیٰ پولیس افسر وجے کمار نے بتایا کہ مکان پر حملہ کرنے کے بعد مسلح شدت پسندوں نے نزدیکی باغ میں پناہ لے لی جہاں مختصر تصادم کے بعد انھیں ہلاک کر دیا گیا۔

خیال رہے کہ جنوبی کشمیر کے پلوامہ، اننت ناگ، شوپیان اور کولگام اضلاع میں 24 اپریل کو بھارتی پارلیمانی انتخابات کے تحت ووٹنگ ہوگی۔

پیر کو ہونے والی سیاسی ریلی سے وزیرِاعلی عمرعبداللہ سمیت اعلیٰ رہنما خطاب کرنے والے تھے۔ ریلی کی تیاری نیشنل کانفرنس کے یوتھ ونگ رہنما یاور مسعودی کے آبائی گھر پر ہو رہی تھی۔

عینی شاہدین کے مطابق وہاں پارٹی کے درجنوں کارکن اور یاور مسعودی کے حمایتی موجود تھے۔

ایک پولیس اہل کار نے نام ظاہر نہ کرنے کی شرط پر بتایا کہ صحن میں دو پولیس اہل کاروں کی لاشیں پڑی تھیں اور مسلح شدت پسند مکان کے اندر سے بھی فائرنگ کر رہے تھے۔ اس واقع کے بعد میں فوج اور نیم فوجی اہل کاروں کی بڑی تعداد نے مکان کا محاصرہ کر لیا۔

پولیس سربراہ اشوک پرساد کا کہنا ہے کہ انتخابات کے دوران کسی بڑے خطرے کا اندیشہ نہیں ہے لیکن گزشتہ کچھ ہفتوں سے جموں اور کشمیر خطوں میں ایسے حملے ہوئے ہیں۔

واضح رہے کہ مسلح تنظیموں کے اتحاد جہاد کونسل کے سربراہ سید صلاح الدین نے لوگوں سے انتخابات کا بائیکاٹ کرنے کی اپیل کی ہے ۔تاہم جہاد کونسل یا کسی مسلح گروپ نے انتخابات میں حصہ لینے والوں کو کوئی واضح دھمکی نہیں دی ہے۔

علیحدگی پسند رہنما سید علی گیلانی نے ایک بیان میں کہا ہے کہ ہندنواز سیاسی نظریات کے حامل لوگوں کو قتل کرنا تحریک کےاخلاقی تقاضوں کے منافی ہے۔

سید صلاح الدین اور سید علی گیلانی کے ساتھ ساتھ شبیر شاہ اور یسین ملک نے الگ الگ بیانات میں کہا ہے کہ ہندنواز سیاسی رہنما کشمیر پر بھارت کے فوجی قبضہ کو دوام بخشنے کے لیے سرگرم ہیں اور لوگوں کو جذباتی نعروں سے بہلاتے ہیں۔

اسی بارے میں