مودی وزارتِ عظمیٰ کا حلف 26 مئی کو اٹھائیں گے

تصویر کے کاپی رائٹ AFP
Image caption نریندر مودی نے بھارتی صدر پرنب مکھرجی سے ملاقات کی اور صدر نے انھیں باضابطہ طور پر حکومت بنانے کی دعوت دی

بھارتی انتخابات میں واضح اکثریت حاصل کرنی والی جماعت بھارتیہ جنتا پارٹی نے اعلان کیا ہے کہ نریندر مودی 26 مئی کو وزارت عظمیٰ کا حلف اٹھائیں گے۔

نریندر مودی نے بھارتی صدر پرنب مکھرجی سے ملاقات کی اور صدر نے باضابطہ طور پر انھیں حکومت بنانے کی دعوت دی۔ اس سے قبل بھارتیہ جنتا پارٹی کے 282 اراکین اسمبلی نے نریندر مودی کو پارلیمانی لیڈر منتخب کیا۔

فی الوقت نریندر مودی اپنی کابینہ کو حتمی شکل دینے کے لیے رہنماؤں سے ملاقاتیں کر رہے ہیں۔

واضح رہے کہ بی جے پی کسی سے اتحاد کیے بغیر حکومت بنا سکتی ہے۔ سادہ اکثریت کے لیے 272 اراکین کی ضرورت ہوتی ہے جبکہ بی جے پی کے 282 اراکین ہیں۔

نریندر مودی نے میڈیا سے بات کرتے ہوئے کہا کہ حلف برداری کی تقریب 26 مئی کو بھارتی وقت کے مطابق شام چھ بجے ہو گی۔

اسی تقریب میں چند سینیئر وزرا بھی حلف اٹھائیں گے۔

منگل کو بی جے پی کے نومنتخب اسمبلی کے اراکین نے مودی کو پارلیمانی لیڈر منتخب کیا جس کے لیے بی جے پی کے سینیئر رہنما ایل کے اڈوانی نے مودی کو نامزد کیا۔

پارلیمانی لیڈر منتخب ہونے کے بعد نریندر مودی نے جماعت سے خطاب کرتے ہوئے کہا کہ انتخابات میں بے جے پی کی کامیابی کے بعد عوام کا جمہوریت پر اعتبار بحال ہوا ہے۔

نریندر مودی خطاب کے دوران اپنے استاد اور سینیئر رہنما ایل کے اڈوانی کا ذکر کرتے ہوئے اشک بار ہو گئے اور انھوں نے وعدہ کیا کہ وہ جماعت اور ملک کا ماں کی طرح خیال رکھیں گے۔

نریندر مودی دہلی سے گجرات روانہ ہوں گے جہاں وہ جلسے سے خطاب کریں گے۔

یاد رہے کہ کانگریس جماعت کو 543 میں سے صرف 44 نشستیں حاصل ہوئی ہیں۔

اسی بارے میں