کیا چین قدامت پسند ہو رہا ہے؟

تصویر کے کاپی رائٹ Getty
Image caption کیا چینی صدر چین کو قدامت پرستی کی طرف لے جا ہے ہیں؟

چین نئے قمری سال کا جشن منا رہا ہے اور اس سال بھی عالمی معیشت پر اپنا اثرو رسوخ بڑھانے کی جانب اپنا سفر جاری رکھ سکتا ہے۔

لیکن ملک کی قیادت کے لیے ایک اہم بحث یہ ہے کہ دنیا چین کو کس قدر متاثر کر رہی ہے۔ ایسے اشاروں میں اضافہ دیکھنے میں آیا ہے جس سے ظاہر ہوتا ہے کہ چین مزید قدامت پرست ہو رہا ہے۔

2012 میں اقتدار سنبھالنے کے بعد سے صدر شی جن پنگ ملک کے انتظامات چلانے کے معاملے میں اختیارات اپنے ہاتھ میں قائم رکھنے کی کوشش کر رہے ہیں۔

وہ اپنے ’چین کا خواب‘ کا تصور پیش کر چکے ہیں، انھوں نے کرپشن کے خلاف لگاتا مہم چلائی اور اس بات پر زور دیا کہ تمام کمیونسٹ عہدیدار پارٹی کو زیادہ بے باکی سے کنٹرول کریں۔

اکتوبر میں صدر شی جن پنگ نے اپنی ایک تقریر میں فنون لطیفہ اور ادب کا ذکر کیا تھا۔ ان کا کہنا تھا ’فنون لطیفہ کو سوشلزم اور عوام کی خدمت کرنا چاہیے‘۔ انھوں نے فنکاروں سے اس خواہش کا اظہار کیا کہ وہ ایسا فن پیش کریں جو ’چینی اقدار۔۔۔۔ اور چین کی حس خوبصورتی‘ کو ظاہر کرے۔

انھوں نے تنبیہہ کی ’فنون لطیفہ مارکیٹ کے غلام نہیں بن سکتے اور نہ کمرشلزم میں ڈوب سکتے ہیں۔‘

ایسا کیا ہو رہا ہے؟ بی بی سی چائنیز کے یوون وو نے چین میں حال ہی ہونے رونما والی تبدیلیوں کا جائزہ لیا

تصویر کے کاپی رائٹ Getty
Image caption چین میں مغرب کی درسی کتب کی تعلیم کے بارے میں بھی تشویش پائی جارہی ہے

1۔ مغربی اقدار کو فروغ دینے والی درسی کتب پر پابندی

چینی وزیرتعلیم 29 جنوری کو یونیورسٹی عہدیداران سے کیے گئے خطاب کی وجہ سے مشکل میں پھنس گئے۔

وزیرتعلیم یوان گیرن نے مغربی درسی کتب کے استعمال پر سخت پابندی کا عہد کیا اور اس امر کا اظہار کیا ’ایسی درسی کتب کی بالکل اجازت نہیں دی جائے جو کمرہ جماعت میں مغربی اقدار کے فروغ کا باعث بنیں‘۔

اس تقریر کے بعد سوشل میڈیا پر دھواں دھار بحث کا آغاز ہو گیا، جس میں بیشتر افراد نے وزیرتعلیم کی جانب پیش کی گئی’مغربی اقدار‘ کی تعریف پر سوال اٹھایا اور یہ پوچھا گیا کہ ان پر پابندی کیوں عائد ہونا چاہیے۔

1 :کیا اس کا مطلب ہے کہ چین مارکس ازم پر پابندی عائد کر دینی چاہیے کیونکہ یہ بھی کس حد تک ‘مغربی اقدار‘ کا حصہ ہے؟ - بذریعہ وائبو

2 :قانون کی بالادستی کے بارے میں کیا کہیں گے؟ جمہوریت اور انسانی حقوق کے بارے میں کیا کہیں گے؟ سوشلزم کے بارے میں کیا کہیں گے؟ - بذیعہ وائبو

3 :اگر آپ ان درسی کتب پر پابندی عائد کرتے ہیں تو آپ میرا کورس بھی منسوخ کر سکتے ہیں یا میرا شعبہ بھی تحلیل کر سکتے ہیں۔ - بذریعہ وی چیٹ

دیگر نے سوال اٹھایا کہ چین بہت سارے اعلیٰ عہدیداران کے بچے مغرب میں زیرتعلیم ہیں، کیا وہ مغربی اقدار سیکھ رہے ہیں۔

ایک ناقد نے کہا ’اعلیٰ طبقے کے لیے الگ اور عام لوگوں کے لیے الگ اصول و ضوابط ہیں، کیا ایسا ہی نہیں ہے؟‘

بی بی سی چائنیز نے مجوزہ پابندی کا ردعمل جاننے کے لیے کئی پروفیسروں سے بات چیت کی۔

بیجنگ کی فارن سٹڈیز یونیورسٹی کے پروفیسر زہان جیانگ کا ماننا ہے کہ مغربی درسی کتب پابندی عملی طور پر ممکن نہیں، کیونکہ بہت سارے مضامین انگریزی میں پڑھائے جاتے ہیں خاص طور پر معاشیات اور قانون، جن کے لیے اکثر مغربی درسی کتب کی ضرورت پیش آتی ہے۔

شنگھائی یونیورسٹی کے شعبہ تاریخ کے پروفیسر زہو ژوئکن یاد کرتے ہیں کہ 2011 میں وزیرتعلیم یوان نے غیر ملکی درسی کتب کے استعمال کی حمایت کی تھی۔ ان کا کہنا تھا ’وقت تبدیل ہوگیا ہے اور وہ ہوا کا بدلتا ہوا رخ دیکھ رہے ہیں۔‘

چائنیز اکیڈمی آف سوشل سائنسز کے زہو جدونگ وزیر تعلیم کے موقف کی حمایت کرتے ہیں۔

انھوں نے روزنامہ گوانگمنگ میں لکھا کہ جب وزیرتعلیم نے مغربی اقدار کی بات کی تو ان کا اشارہ مغرب اور خاص طور پر امریکا کے ان رجحانات کی طرف تھا جنھیں منفی سمجھا جاتا ہے، جو آئینی جمہوریت، عالمگیری اقدار، شہری معاشرہ، نیو لبرازم وغیرہ کو فروغ دیتے ہیں۔ (اس تنقید میں مغرب کی سائنسی تعلیمات شامل نہیں تھیں)۔

تاہم زہو جدونگ کے تمام قارئین ان سے متفق نہیں تھے۔ ان کے اس مضمون کے نیچے لکھا گیا ایک تبصرہ یہ تھا:

’آئینی جمہوریت، عالمگیری اقدار، شہری معاشرہ کیسے منفی خیالات ہو سکتے ہیں؟ کیا آپ صدر ژی جنپنگ کے لیے مشکلات پیدا نہیں کر رہے؟‘

یہ بحث جاری ہے اور ہر کوئی گہری دلچسپی سے دیکھ رہا ہے کہ ان اب مغربی درسی کتب کا کیا ہوگا۔

2- ٹی وی ڈراموں میں نیم عریانیت پر پابندی

تصویر کے کاپی رائٹ AP
Image caption چین کے معروف ٹی وی ڈرامے ’ایمپریس آف چائنہ‘ کو مبینہ نیم عریانیت کے باعث سینسر کیا گیا

‘ایمپرس آف چائنہ‘ معروف ٹی وی ڈرامہ ہے جو ساتویں صدی عیسویں کے پس منظر میں فلمایا گیا ہے، اس ڈرامے میں چینی تاریخ کی واحد خاتون حکمران وو زیتین کی زندگی کی عکاسی کی گئی ہے۔

کثیر لاگت سے تیار کیے گئے اس ڈرامے میں عصر حاضر کی بہترین کاری گری اور شاندار ملبوسات کا استعمال کیا گیا ہے، ان ملبوسات میں بیشتر کھلے گلے والے لباس شامل ہیں جو عام طور پر چینی ڈراموں میں دکھائی نہیں دیتے۔

نئے سال کے آغاز سے قبل چند قسطوں کے بعد اس کی نشریات ’تکنیکی وجوہات‘ کی بنا کر روک دی گئیں۔

جب اس کو دوبارہ نشر کیا گیا تو یہ بالکل مختلف تھا۔ خواتین کی عکاسی کرنے والے تمام مناظر کو ری فریم کیا جا چکا تھا، جس میں سر کافی بڑا دکھائی دے رہا تھا اور گلے کے نیچے کچھ دکھائی نہیں دے رہا ہے۔

بہت سارے لوگوں نے محسوس کیا کہ ڈرامے کے مناظر بے ربط اور تکلیف دہ دکھائی دیے، مناظر سے ملبوسات کے غائب ہونے سے خوبصورتی کی عنصر بھی ختم ہوگیا۔

انھوں نے کہا کہ بیوروکریٹس نے ’پروڈکشن ٹیم کی محنت ضائع کر دی ہے، جنھوں نے تاریخی ماحول پیدا کرنے لیے غیرمعمولی کوششیں کی تھیں‘۔

لیکن اس کی حمایت میں بھی کچھ آوازیں تھیں۔ کچھ نے محسوس کیا کہ ایک بار جب یہ رجحان (ٹی وی سکرین پر بہت زیادہ جسم کی نمائش) شروع ہو جائے گا تو دوسرے بھی اس کی پیروی کریں گے، اور ایک دن یہ صورتحال کنٹرول سے باہر ہو جائے گی۔

قومی ٹیلی وژن کی انتظامیہ نے وضاحت کی کہ دسمبر 2014 میں ابتدائی نشریات کے بہت انہیں مخصوص مناظر کے بارے میں بہت ساری شکایات موصول ہوئیں کہ یہ مناظر نوجوان افراد کے لیے ’غیر موزوں‘ ہیں۔

سینسنرز نے ان کا معائنہ کیا اور یہ سچ ثابت ہوا چانچہ انہیں کاٹ دیا گیا۔ انہوں نے کہا کہ فنون لطیفہ کو چینی اقدار کا فروغ کرنا چاہیے اور ’اصل‘ خوبصورتی کو پھیلانا چاہیے۔

3۔ موٹر شوز میں ماڈلز پر پابندی

تصویر کے کاپی رائٹ Reuters
Image caption بعض لوگوں کا خیال ہے کہ موٹر شوز میں خواتین ماڈلز کی شرکت کے باعث وہ گاڑیوں پر توجہ مرکوز نہیں رکھ سکتے

نئے سال کے آغاز پر شنگھائی موٹر شو کی انتظامی کمیٹی نے ایک حیرت انگیز اعلان کیا کہ اس سال سے گاڑیوں کی نمائش میں ماڈلز پر پابندی ہوگی۔

یہ شو 22 سے 29 اپریل کو منعقد ہوگا اور منتظمین کا کہنا ہے کہ اس سال وہ ’اپنی بنیاد کی طرف لوٹیں گے اور عوام کے دیکھنے کے لیے نیا اور مہذب ماحول پیدا کریں گے‘۔

چینی گاڑیوں کے شوز میں خواتین ماڈلز 1993 میں پہلی بار متعارف کروائی گئی تھیں، لیکن وہ کسی بھی موٹر شو کا لازمی جز بن چکی تھیں، جس میں ماڈلز مختصر لباس زیب تن کرتی ہیں، جسے ’جسم کا معرکہ‘ کا نام بھی دیا گیا ہے۔

چینی میڈیا کا کہنا ہے کہ مارکیٹنگ کا یہ انداز ’معاشرے کے صبر کی سطح کو چیلنج کرتا ہے‘۔

پہلی دو پابندیوں کے مقابلے میں اس پابندی کے بارے میں سوشل میڈیا میں خاصے مثبت ردعمل سامنے آئے۔ بہت سارے افراد نے اس کی تعریف میں کہا کہ ’بہت اچھا، اب ہم اپنی توجہ گاڑیوں پر مرکوز رکھ سکیں گے‘۔

کچھ نے محسوس کیا کہ گاڑیوں پر توجہ رکھنا خاصا مشکل ہو جاتا ہے جب آپ کے ارد گرد مختصر لباس میں ملبوس ماڈلز ہوں۔ اگر انہیں ہٹا دیا گیا ہے تو یہ اچھی بات ہے۔

اب تمام نگاہیں اپریل میں ہونے والے شنگھائی موٹر شو پر مرکوز ہیں کہ کیا واقعی اس پابندی پر عمل درآمد کیا جاتا ہے۔

اسی بارے میں