بھارت کی پانچ ریاستوں میں انتخابات کی تاریخوں کا اعلان

تصویر کے کاپی رائٹ Reuters
Image caption انتخابات چار اپریل سے 16 مئی تک جاری رہیں گے جبکہ ووٹوں کی گنتی 19 مئی کو ہوگی

بھارتی الیکشن کمیشن نے بھارت کی پانچ ریاستوں میں اپریل سے انتخابات کا اعلان کیا ہے۔

ریاستی حکومت کے لیے تمل ناڈو، کیرالہ، آسام، مغربی بنگال اور پانڈی چیری میں انتخابات کرائے جائيں گے۔

یہ اعلان بھارت کے چیف الیکشن کمیشنر نسیم زیدی نے جمعے کو کیا ہے۔

پانچ ریاستوں میں ہونے والے یہ انتخابات رواں سال چار اپریل سے شروع ہو رہے ہیں اور 16 مئی تک جاری رہیں گے۔ جبکہ ووٹوں کی گنتی 19 مئی کو ہوگی۔

ان انتنخابات میں ان آبادیوں کے افراد بھی ووٹ دینے کے اہل ہوں گے جن بستیوں کو بھارت نے بنگلہ دیش کے ساتھ تبادلے میں حاصل کیا ہے۔

مسٹر نسیم زیدی نے کہا کہ پانچ ریاستوں میں تقریبا 17 کروڑ افراد ووٹ ڈالنے کے اہل ہوں گے۔

تجزیہ نگاروں کا کہنا ہے کہ روایتی طور پر ان انتخابات میں مقامی پارٹیوں کا بول بالا رہے گا۔

مغربی بنگال میں ووٹ چھ مرحلے میں چار، 17، 21، 25 اور 30 اپریل کے علاوہ پانچ مئي کو بھی ڈالے جائیں گے۔

تصویر کے کاپی رائٹ Reuters
Image caption آسام میں دو مرحے میں ووٹ ڈالے جائیں گے

کوچ بہار کے شہری بھی پانچ مئی کو انتخابات میں ووٹ ڈالیں گے۔ یہ ضلع ان 16 ہزار افراد کا ضلع ہے جہاں بنگلہ دیش کی 160 چھوٹی چھوٹی بستیوں کے لوگوں کو تبادلے میں بھارت نے اپنا شہری تسلیم کیا ہے۔

مسٹر زیدی نے کہا کہ بھارتی انتخابی کمیشن اس بات کی یقین دہانی کرانے کی کوشش میں ہے کہ ان شہریوں کے ووٹنگ کارڈ انھیں مل جائیں تاکہ ’وہ دنیا کی سب سے بڑی جمہوریت کے انتخابی عمل میں شرکت کر سکیں۔‘

شمال مشرقی ریاست آسام میں دو مرحلے میں انتخابات کرائے جائيں گے۔ پہلے مرحلے میں چار اپریل کو جبکہ دوسرے مرحلے میں 11 اپریل کو ووٹ ڈالے جائیں گے۔

تمل ناڈو، کیرالہ اور پانڈی چیری میں ایک ہی دن 16 مئی کو ووٹ ڈالے جائیں گے۔

بنگال میں مقابلہ برسر اقتدار ترنمول کانگریس اور بائیں بازو کی جماعتوں میں ہے جبکہ آسام میں کانگریس کے خلاف بی جے پی اور بدرالدین اجمل کی پارٹی اے آئی یو ڈی ایف ہوگی۔

تمل ناڈو میں وزیر اعلی جے للتا اور کرونا ندھی کی پارٹیاں آمنے سامنے ہوں گی جبکہ کیرالہ میں کانگریس اور بائیں بازو کی جماعتیں مقابلے میں ہوں گی۔

اسی بارے میں