’مہاجرین کی اگلے سال واپس کی کوشش ہے‘

پاکستان میں اقوام متحدہ کے ادارے برائے مہاجرین نے کہا ہے کہ اس وقت پوری دنیا میں مہاجرین کی سب سے بڑی تعداد پاکستان میں ہے اور کوشش کی جائے گی آئندہ سال تک ان کی مکمل افغانستان واپسی کویقینی بنایا جائے۔

اس بات کا اعلان پاکستان میں سوئیڈن کےسفیر لارس وائڈے اور اقوام متحدہ کے ادارے برائے مہاجرین (یواین ایچ سی آر) پاکستان کے سربراہ نیل رائٹ نے بدھ کو کو ئٹہ میں پریس کانفرنس میں کیا۔

ان کا کہنا تھا کہ پاکستان میں اس وقت سات اعشاریہ پانچ ملین مہاجرین آباد ہیں جن میں بڑی تعداد افغان مہاجرین کی ہے۔

’دیگر ممالک کے مقابلے میں اس وقت پاکستان میں مہاجرین کی تعداد سب سے زیادہ ہے۔ اور پاکستان گذشتہ تیس سالوں سے افغان مہاجرین کا بوجھ برداشت کررہا ہے۔‘