آرورا: پولیس حملہ آور کے مکان میں داخل

امریکی ریاست کولوراڈو کے شہر آرورا کے ایک سینما گھر میں فائرنگ کرنے والے مشتبہ حملہ آور جیمز ہومز کے فلیٹ میں پولیس بالآخر داخل ہونے میں کامیاب ہو گئی ہے۔

جیمز ہومز کو سینما گھر میں فائرنگ کے واقعے کے بعد اسلحے سمیت گرفتار کیا گیا تھا۔

بیٹ مین فلم سیریز کی نئی فلم دی ڈارک نائٹ رائزز کی افتتاحی نمائش کے دوران جیمز ہومز کی فائرنگ سے بارہ افراد ہلاک اور انسٹھ زخمی ہو گئے تھے۔

امکان ہے کہ انہیں پیر کو عدالت میں پیش کیا جائے گا۔

گزشتہ دو روز سے آرورا کی پولیس جیمز ہومز کے فلیٹ کا محاصرہ کیے ہوئے تھی لیکن فلیٹ میں دھماکہ خیز مواد کے جال نے پولیس کو فلیٹ میں داخل ہونے سے باز رکھا۔

امریکی پولیس نے طویل کوشش کے بعد بالآخر ایک روبوٹ کی مدد سے اس جال کو ناکارہ بنایا۔