’کشتی ڈوبنے سے درجنوں تارکینِ وطن ہلاک‘

انڈونیشیا سے موصول ہونے والی اطلاعات کے مطابق مغربی جاوا کےقریب سمندر میں کشتی ڈوبنے سے درجنوں غیرقانونی تارکینِ وطن ہلاک ہوگئے ہیں۔

کشتی ڈوبنے کا واقعہ اس وقت سامنے آیا ہے جب انڈونیشیائی ماہی گیروں نے سمندر سے چودہ افغان پناہ گزینوں کو بچایا۔

ان تارکینِ وطن میں ایک نے صحافیوں کو بتایا کہ ڈوبنے والی کشتی پر 72 افراد سوار تھے اور ان کی منزل آسٹریلوی جزیرہ کرسمس آئی لینڈ تھا۔

انڈونیشیائی حکام نے اس سلسلے میں آسٹریلیا کے بحری تحفظ کے حکام کو مطلع کر دیا ہے تاہم یہ واضح نہیں کہ حادثے کا شکار ہونے والی کشتی کے مسافروں کی تلاش کے لیے آپریشن شروع ہوا ہے یا نہیں۔