افغانستان: اعلیٰ خاتون پولیس افسر ہلاک

افغانستان کے صوبہ ہلمند میں ایک اعلیٰ خاتون پولیس اہلکار کو فائرنگ کر کے ہلاک کر دیا گیا ہے۔

پولیس کے ترجمان کے مطابق لیفٹینٹ اسلام بی بی لشکرہ گاہ میں اپنے داماد کے ساتھ موٹر سائیکل پر جا رہی تھیں کہ نامعلوم مسلح افراد نے ان پر فائرنگ کر دی۔

اسلام بی بی بتیس خاتون پولیس افسران کی کمانڈر تھیں اور انہیں پولیس میں ملازمت کرنے پر خاندان کی جانب سے تنقید کا سامنا تھا اور اپنے ہی بھائیوں نے دھمکی دی تھی۔

دریں اثناء ہلمند میں سڑک کنارے نصب بم کے پھٹنے سے چار لڑکیاں ہلاک ہو گئی ہیں۔ ہلاک ہونے والی لڑکیوں کی عمر سات سے بارہ سال کے درمیان تھی اور وہ دریا سے پانی لینے جا رہی تھیں۔